Umuyobozi w’Intara y’Iburasirazuba CG Gasana K. Emmanuel aranenga abayoboye u Rwanda bakarushora muri Jenoside yakorewe Abatutsi mu 1994, ashima kandi Ingabo za RPA na RPF biyemeje kuyobora igihugu bashingiye ku bumwe bw’abanyarwanda, anasaba abakozi ba leta kwimakaza iyi politiki.
Kuri uyu wa 24 Kamena ku biro by’Akarere ka Gatsibo habereye umuhango wo Kwibuka ku nshuro ya 28 Jenoside yakorewe Abatutsi mu 1994, by’umwihariko hibukwa abari abakozi 28 b’amakomini yahujwe akabyara Akarere ka Gatsibo, bishwe muri Jenoside yakorewe Abatutsi mu 1994.
Guverineri CG Gasana yifatanyije n’abakozi b’akarere ka Gatsibo n’imiryango y’abari abakozi bishwe muri Jenoside yakorewe abatutsi mu 1994 mu muhango wo Kwibuka, mu ijambo rye yagarutse ku ruhare rw’abari abayobozi bahisemo gukorera jenoside abo bayoboraga.
Guverineri Gasana yakomeje agira ati “Kuba twibuka abakozi ba leta bishwe uyu munsi biduhe imbaraga zo kwamamaza amatwara na politiki nziza yo gukunda abanyarwanda, y’iterambere, ntabwo ari iyo kubiba amacakubiri no kwica no gukora nk’ibyo bariya bakoze bakora Jenoside yakorewe Abatutsi mu 1994”
Guverineri CG Gasana kandi yanenze abari abayobozi bateguye Jenoside yakorewe abatutsi, yagize ati: “Ubumenyi twize bwagombye kudufasha kumenya agaciro k’uburenganzira bwa muntu ariko mu Rwanda intiti nizo zacuze umugambi wo gukora Jenoside yakorewe abatutsi mu 1994, ibyo bakoze twe ni amasomo twiga kandi tubyita guta umuco, bitwereka ko ushobora kuba ufite ubwenge udafite umutima.”
Mu buhamya bwatanzwe n’ibiganiro byose byagarutse ku ruhare rw’ubuyobozi bwagize mu kwica abaturage bari bashinzwe kuyobora, umwe mu batanze ubuhamya yagarutse ku mateka yihariye y’imibereho y’abatutsi mbere ya jenoside, aho na mbere ya Jenoside hari abaturage bishwe bazira ko ari abatutsi.
Umuyobozi w’Akarere ka Gatsibo Gasana Richard yatangaje ko mu rwego rwo guha agaciro abari abakozi bishwe muri Jenoside yakorewe Abatutsi, ku biro by’akarere hazashyirwa urwibitso ruriho amazina y’abishwe muri Jenoside yakorewe abatutsi bari abakozi.
Ku biro by’Akarere ka #Gatsibo hari kubera umuhango wo Kwibuka ku nshuro ya 28 abari abakozi b’amakomini yahujwe akabyara Akarere ka Gatsibo, bazize Jenoside yakorewe Abatutsi mu 1994.#Kwibuka28https://t.co/yZNrJXVmIP pic.twitter.com/DKtIWQqLTj
— MUHAZI YACU (@muhaziyacu) June 24, 2022
