Akarere ka Rwamagana katangije igikorwa cyo gutera ibiti miliyoni ebyiri n’ibihumbi 300(2,300,000) mu gihe cy’imyaka ibiri, mu rwego rwo kongera ubuso buteyeho ibiti, kubungabunga ibidukikije no kurengera urusobe rw’ibinyabuzima; by’umwihariko ibikikije Ikiyaga cya Muhazi.
Iki gikorwa cyatangirijwe ku mugaragaro mu Kagari ka Nkomangwa, mu Murenge wa Munyiginya, aho hatewe ibiti bisaga ibihumbi bitatu. Kizakorwa ku bufatanye n’abafatanyabikorwa batandukanye barimo imishinga ya TREPA na COMBIO.
Umuyobozi Mukuru w’Ibikorwa mu Karere ka Rwamagana, Nsanzamahoro Ernest, yabwiye MUHAZIYACU ko iki gikorwa kijyana no gutegura igihembwe cy’ihinga cya A 2027, asaba abaturage kugira uruhare mu kubungabunga ibidukikije.
Yagize ati: “Twatangiye igihembwe cy’ihinga cya A 2027, no gutera ibiti birajyana. Mu Karere ka Rwamagana dufite gahunda yo gutera ibiti miliyoni 2.3, ku bufatanye n’imishinga ya TREPA na COMBIO. Turasaba abaturage kubungabunga urusobe rw’ibinyabuzima biri mu Kiyaga cya Muhazi, hakabungabungwa metero 50 uvuye ku kiyaga. Itandukaniro risanzwe rihari ni uko turi gutera ibiti gakondo bizwi cyane nk’Imigenge.”
Mu rwego rwo gushyira mu bikorwa iyi gahunda, Akarere ka Rwamagana kazafatanya na TUBURA guha abaturage ibiti 1,411,696 mu gihe cy’imyaka ibiri, kugira ngo na bo bagire uruhare mu kongera ibiti mu ngo no mu mirima yabo.
Ndayambaje Emmanuel, umwe mu baturage bitabiriye iki gikorwa, yavuze ko gutera ibiti ari ingenzi kuko bifasha gutafa ubutaka, ati: “Gutera ibiti ni ingenzi kuko bidufasha kurengera ibidukikije no kubungabunga ubutaka bwacu. Icyo dusabwa ni ukubifata neza, tukabirinda kwangizwa n’amatungo cyangwa ibindi bishobora kubyangiza, kugira ngo bizakurane kandi bitugirire akamaro mu gihe kizaza.”
Mu rwego rwo kurengera inkombe z’Ikiyaga cya Muhazi, hateganyijwe gutera ibiti ku buso bwa hegitari 32, bikazaba bisaga ibihumbi 51. Muri byo harimo ibiti by’imbuto ziribwa bigera ku bihumbi 44, bigamije gufasha mu kubungabunga ibidukikije no guteza imbere imibereho y’abaturage.
Mutimura Evariste, undi muturage witabiriye iki gikorwa, yagize ati: “Ikiyaga cya Muhazi ni umutungo ukomeye ku baturage, ni yo mpamvu tugomba gufatanya kukibungabunga. Gutera ibiti no kubisigasira mu nkengero zacyo bizafasha kurinda ubutaka gutwarwa n’amazi no kubungabunga ibinyabuzima biri muri iki kiyaga.”
Umushinga wa TREPA na wo uzagira uruhare mu kuvugurura amashyamba y’abaturage, aho uzabaha ibiti by’inturusu byo kuvugurura amashyamba yabo no kongera umusaruro wayo. Biteganyijwe ko hazavugururwa amashyamba ari kuri hegitari 227.
Iyi gahunda iri mu murongo w’intumbero y’Intara y’Iburasirazuba yo gutera ibiti miliyoni 40 mu gihe cy’imyaka ibiri. Muri iyo ntego, Akarere ka Rwamagana gafitemo ibiti bisaga miliyoni 2.3.
Gahunda yo gutera ibiti no kuvugurura amashyamba ni imwe mu ngamba zigamije kurengera ubutaka, kugabanya isuri, kubungabunga urusobe rw’ibinyabuzima no kongera umutungo kamere, cyane cyane mu bice bikikije Ikiyaga cya Muhazi.
