Ushinzwe guhuza abaturage na pariki z’Igihugu mu kigo cy’Iterambere-RDB, Mbabazi Marie Louise, arasaba bamwe mu baturiye ibice bikora kuri Pariki y’Akagera ubufatanye bwo kuyirinda kugira ngo umusaruro ubashe kwiyongera; n’amafaranga ava mu bukerarugendo abagarukire kugira ngo batezwe imbere.
Buri mwaka abaturiye Pariki y’Igihugu y’Akagera basaranganywa 10% by’inyungu iba yabonetse muri Pariki binyuze mu kubakirwa ibikorwaremezo, guteza imbere abatishoboye, amakoperative n’ibindi bikorwa biteza imbere abaturage.
Muri uyu mwaka Akarere ka Gatsibo kahawe Miliyoni 98 Frw, Kayonza ihabwa miliyoni 500 Frw, Nyagatare ihabwa miliyoni 300 Frw. Uturere dukora n’abafatanyabikorwa bakabigira imishinga bakayishyira no mu bikorwa.
Ubwo yari mu Murenge wa Rwimbogo, Akarere ka Gatsibo, Mbabazi Marie Louise, ushinzwe guhuza abaturage na pariki z’Igihugu muri RDB, yavuze ko amafaranga ava mu bukerarugendo agaruka mu baturiye pariki.
Ati: “Aho ujishe igisabo ntuhatera ibuye kubera ko amafaranga ava ku bukerarugendo avamo ibikorwa bimwe, kera ntabwo bigeze bamenya akamaro ka pariki baturanye nazo ariko kubera ubuyobozi bwiza bwabatekerejeho, bakora imishinga ibateza kugira ngo barusheho gukunda pariki n’ibiyirimo n’uko bazaba bamenye akamaro kibivamo.”
Akomeza agira ati: “Nababwiye ko icyo dupfana n’icyo tumariranye ko niba mubonye amafaranga ava mu bukerarugendo mu gaterwa inkunga kugira ngo namwe mutere imbere, namwe mugomba gukora uko mushoboye tugafatanya kurinda iyo pariki.”
“Kugira ngo umusaruro urusheho kwiyongera, n’uko izaba yabungabunzwe abaza kuyisura bya bintu baje kureba bagasanga nabyo bifite umutekano, noneho ba rushimusi bakabahashya batanga amakuru ku gihe kugira ngo nabo baganirizwe bajye mu makoperative ejo n’ejo bundi bacike mu gihugu.”
Mbabazi yavuze ko ugereranyije no mu myaka yashize imibare ya ba rushimusi igenda igabanyuka binyuze mu bukangurambaga bw’abazituriye bibumbiye mu makoperative.
Ati: “Nta byera ngo nde ntibabura ariko ntabwo ari benshi nka mbere n’imitego ntibagifata myinshi cyane, kuko hari igihe watemberega ugasanga hari resitora batetse imbogo ivuye muri Pariki y’Akagera cyangwa inyemera.”
Yasoje avuga ko abaturage batuye Pariki z’Igihugu bubakiwe amashuri atandukanye arimo ay’imyuga, amavuriro, ibigega byo gutuburiramo imbuto zo gutera no guhunikamo imbuto z’ibirayi, amakusanyirizo, amarerero, amakoperative y’ububoshyi, ububaji n’ubuvumvu bwa kijyambere.
Pariki y’Akagera yashinzwe mu 1934 ihabwa izina biturutse ku Mugezi w’Akagera unyura hafi yayo. Ni cyo gishanga kinini muri Afurika y’Iburasirazuba n’iyo Hagati mu kugira urusobe rw’ibinyabuzima byinshi uhereye ku bimera, ibishanga, ibiyaga n’inyamaswa.
Iyi pariki ifite inyamaswa nini z’inyamabere zigera ku bihumbi 12 n’ubwoko bw’inyoni bwabashije kumenyekana burenga 520.
