Polisi y’u Rwanda mu Ntara y’Iburasirazuba yagaragaje ko kubahiriza amategeko y’umuhanda hagamijwe kwirinda impanuka, ari inshingano za buri wese, isaba abakora umwuga wo gutwara abagenzi kuri moto n’abatwara abagenzi ku magare mu Karere ka Bugesera; kugira uruhare mu kurinda impanuka abantu bose bakoresha umuhanda.
Ibi babishishikarijwe kuri uyu wa Kane tariki 11 Ukuboza 2025, ubwo abamotari n’abanyozi n’ubuyobozi bwa Polisi w’u Rwanda mu Ntara y’Iburasirazuba bahuriraga mu bukangurambaga bwa ‘Turindane tugereyo amahoro”, bwabereye kuri Sitade y’Akarere ka Bugesera.
Umuvugizi wa Polisi w’u Rwanda mu Ntara y’Iburasirazuba, SP Twizeyimana Hamdun yavuze ko ubu bukangurambaga bugamije kwimakaza umuco wo gukoresha neza umuhanda hagamijwe kugabanya impanuka ziwuberamo.
Ati: “Ubukangurambaga ‘Turindane Tugereyo Amahoro’ ni mu rwego rwo kurushaho gukangurira buri wese ukoresha umuhanda yumve ko umutekano wo mu muhanda ari inshingano z’ukoresha umuhanda kurenza ko ari inshingano za Polisi, buri wese yirinde impanuka ayirinda n’abandi.”
SP Twizeyimana akomeza agira ati: “Kugira ngo turindane tugereyo amahoro, ibyiciro byose bikoresha umuhanda bigomba koroherana no kubahana utitaye kuvuga ngo utwaye ikinyabiziga kinini cyangwa gito, ugakurikiza uko amategeko abiteganya, tukubahiriza amategeko y’umuhanda kubera ko ari ukurengera ubuzima bwacu, abantu ntibayubahirize ari uko batinya Polisi cyangwa batinya guhanwa, ahubwo bumve ko ari ukurengera umutekano wo mu muhanda. “
Yakomeje agaragaza ko abatwara abagenzi kuri moto no ku magare bafite uruhare rinini mu gutera impanuka zo mu muhanda, ati: “Haracyari impanuka zigirwamo uruhare n’abatwara amagare n’abatwara moto bitewe no kutubahiriza amabwiriza, amategeko n’ibimenyetso byo ku muhanda. Dukwiye guhinduka tukumva ko dukwiye kubahiriza amategeko y’umuhanda kubera ko dushaka kugera iyo tujya amahoro; tukabikora tudatinya guhanwa, tukabikora tudatinya abapolisi , tudatinya Camera cyangwa n’umuyobozi uri aho hafi.”
Polisi y’u Rwanda kandi ivuga ko muri uyu mwaka wa 2025 impanuka zagabanyutse mu buryo bugaragara ugereranyije na 2024, aho zagabanyutseho 2.5%.
Gahunda y’ubukangurambaga bwa ‘Gerayo amahoro’ yatangijwe muri 2019 ariko ku itariki 15 Ukwakira 2025 yihongereyemo ‘Turindane Tugereyo Amahoro’.
