Irushanwa rya Kirehe Open Volleyball Tournament rigiye kongera kuba nyuma y’imyaka itatu ritaba, aho rizahuza amakipe yo mu cyiciro cya mbere mu Rwanda mu bagore n’abagabo, n’abahoze bakina Volleyball, mu rwego rwo gukomeza guteza imbere uyu mukino mu Karere ka Kirehe.
Biteganyijwe ko iri rushanwa rizaba kuva tariki 2 kugeza ku ya 4 Ukwakira 2026, ribere mu nyubako nshya y’imyidagaduro n’imikino ya Kirehe Gymnasium, aho rizitabirwa n’amakipe yo mu cyiciro cya mbere ndetse n’abakanyujijeho muri uyu mukino.
Kirehe Open Volleyball Tournament igiye kuba ku nshuro ya Kane. Mu marushanwa abiri yabanje, iri rushanwa ryakinwaga ku izina rya “Gisaka Open”, mbere y’uko rihindurirwa izina rikaba Kirehe Open Volleyball Tournament.
Ritegurwa n’Akarere ka Kirehe ku bufatanye n’Ishyirahamwe ry’Umukino wa Volleyball mu Rwanda (FRVB), hagamijwe gukomeza gukundisha Abanya-Kirehe Volleyball no guha abakunzi b’uyu mukino umwanya wo kwishimira imikino ihuza amakipe akomeye.
Iri rushanwa kandi ni kimwe mu bikorwa bigaragaza uruhare rwa Kirehe mu guteza imbere Volleyball, kuko aka Karere gakomeje kwiyubakira izina nk’igicumbi cy’uyu mukino.
Biteganyijwe ko muri iri rushanwa hazitabira amakipe yo mu Rwanda Senior Volleyball League, Serie A, mu bagabo no mu bagore, ndetse hakazaba n’imikino y’amakipe y’urubyiruko n’ay’abahoze bakina Volleyball.
Ishyirahamwe ry’Umukino wa Volleyball mu Rwanda (FRVB) ryatumiye amakipe asanzwe muri shampiyona y’Igihugu muri iri rushanwa, arimo APR WVC, APR MVC, EAUR WVC, EAUR MVC, Gisagara VC, Kepler WVC, Kepler MVC, KVC, Police WVC, Police MVC, REG VC, RRA VC, RP Huye VC, RP Ngoma VC, Ruhango VC na Kirehe VC.
Amakipe azahurira muri Kirehe azabona umwanya wo kwitegura umwaka mushya w’imikino, mu gihe Abanya-Kirehe n’abakunzi ba Volleyball bazaba bafite amahirwe yo kureba imikino y’amakipe akomeye hafi yabo.
Imikino izamara iminsi itatu
Ku wa Gatanu tariki ya 2 Ukwakira 2026, imikino izatangira saa 14:00 ikomeze kugeza saa 22:00.
Ku wa Gatandatu tariki ya 3 Ukwakira, imikino izatangira saa 10:00 kugeza saa 22:00, hakaba harimo imikino ibanza n’iya ¼, bitewe n’umubare w’amakipe azitabira.
Ku Cyumweru tariki ya 4 Ukwakira, hazakinwa imikino ya ½ n’iya nyuma, kuva saa 10:00 kugeza saa 15:00.
Abategura iri rushanwa bavuga ko gahunda y’imikino izashingira ku mubare w’amakipe azaba yiyandikishije.
Kugaruka kwa Kirehe Open Volleyball Tournament nyuma y’imyaka itatu ni amahirwe yo kongera guhuza abakunzi ba Volleyball, abakinnyi bakiri mu kibuga n’abahoze bawukina, mu gihe Kirehe ikomeje gushyira imbaraga mu guteza imbere siporo no kugaragaza uruhare rwayo mu iterambere rya Volleyball mu Rwanda.
