Umuvunyi Mukuru, Nirere Madeleine yabwiye abaturage bo mu Karere ka Ngoma ko iyo utanze ruswa wowe ukena uwo uyibaye agakira, bityo ko nta mpamvu yo kugura serivise bemerewe ku buntu, abasaba kuyirinda no gutanga amakuru kuriyo.
Ibi yabigarutseho mu bukangurambaga bw’icyumweru ku kurwanya ruswa n’akarengane urwego rw’Umuvunyi rurimo mu Karere ka Ngoma ku nsanganyamatsiko igira iti “Duhuze imbaraga turwanye ruswa”
Umuvunyi mukuru, Nirere Madeleine, yagize ati “Igihugu cyacu gishishikariye kurwanya ruswa aho iri hose kandi nta ruswa ntoya ibaho kuko ruswa itera akarengane; n’iyo umuntu yakwaka 500Frw, ni ukuvuga ngo ruswa ni imungu imunga ubukungu bw’igihugu.”
Akomeza agira ati: “Iyo utanze ruswa wowe urakena, uwo uyihaye agakira, nta mpamvu rero yo kugura serivise wemerewe. Nta mpamvu yo kurenza amafaranga yagenwe n’itegeko ngo urenzeho ayandi.”
Umuvunyi mukuru yavuze ko u Rwanda rushaka kuba ku isonga mu kurwanya ruswa ku Isi.
Nirere yagize ati: “Iyo turebye aho Igihugu cyacu gihagaze turi ku mwanya wa 43 ku rwego rw’Isi n’amanota 57%, ntabwo ari amanota makeya ugereranyije n’aho dushaka kujya, turashaka kuba aba mbere mu myaka 25 iri mbere.”
Ni ukuvuga ngo icyerekezo 2050 u Rwanda ruzaba ari urwa mbere ku Isi mu bihugu birwanya ruswa, twagira ngo rero tubasabe kugira ngo tugere kuri icyo cyerekezo icya mbere, twubahirize amategeko, ikindi dutange amakuru cyane cyane ku utaduhaye serivise nziza, yihuse ndetse n’utwatse ruswa.”
Nirere yababwiye ko utanze amakuru arindwa(agirirwa ibanga), ariyo mpamvu babashishikariza gutanga amakuru nko guhamagara urwego rw’Umuvunyi kuri nimero 199 ndetse no kohereza ubutumwa kuri nimero itishyurwa 1989.
Ingingo ya 4 y’Itegeko n°54/2018 ryo kuwa 13/08/2018 ryerekeye kurwanya ruswa, ivuga ko Umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa; aba akoze icyaha.
Iyo abihamijwe n’urukiko, ahanishwa igifungo kirenze imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.
