Urubyiruko rw’abakorerabushake mu Karere ka Rwamagana rwatangije ibikorwa byahariwe guteza imbere imibereho myiza y’abaturage, aho mu gihe cy’ukwezi ruzibanda ku gufasha abatishoboye, kubakira imiryango itagira amacumbi aho bazubaka inzu zirindwi guhera ku musingi kugeza zuzuye, gusana inzu, kubaka ubwiherero no kubaka imirima y’igikoni.
Ibikorwa byatangiriye mu Murenge wa Kigabiro, Akagari ka Nyagasenyi, aho urubyiruko rw’abakorerabushake rwo mu bice bitandukanye by’Akarere rwahuriye hamwe mu gikorwa cyo gukora umuhanda.
Umuhuzabikorwa w’urubyiruko rw’abakorerabushake mu Karere ka Rwamagana, Ntaganira Eugene, yavuze ko ibi bikorwa bizakorwa mu gihe cy’ukwezi, bikazasozwa ku wa 31 Ukwakira 2026 mu Murenge wa Muyumbu, aho bazubakira umuturage utishoboye.
Yagize ati: “Uyu munsi ni umunsi twatangije ukwezi kwahariwe ibikorwa by’urubyiruko rw’abakorerabushake. Ibi bikorwa bizamara ukwezi kose, tukazabisoza ku wa 31 Ukwakira. Twatangiriye mu Murenge wa Kigabiro, Akagari ka Nyagasenyi, aho twakoze umuhanda.”
Ntaganira yavuze ko muri uku kwezi urubyiruko ruzibanda ku bikorwa bitandukanye bigamije gufasha imiryango itishoboye no guteza imbere imibereho myiza y’abaturage, ati: “Tuzubakira abatishoboye inzu duhereye ku musingi, aho tuzubaka izigeze kuri zirindwi (7), dusane izindi 13, tunubake ubwiherero butanu (5), tuzakora imirima y’igikoni 164 mu rwego rwo kugira uruhare mu kurwanya igwingira rikigaragara mu Karere ka Rwamagana.”
Yasabye urubyiruko rwo mu Karere ka Rwamagana gukomeza kwitabira ibikorwa by’ubukorerabushake, avuga ko uruhare rwabo ari ingenzi mu gukemura ibibazo bibangamiye imibereho y’abaturage.
Bamwe mu rubyiruko rw’abakorerabushake bitabiriye iki gikorwa baganiriye na MUHAZIYACU, bagaragaza ko biteguye gukomeza gutanga umusanzu mu gufasha abatishoboye no guteza imbere imibereho y’abaturage.
Dushime Belyze yavuze ko ubukorerabushake ari uburyo urubyiruko rukoresha mu kugira uruhare mu iterambere ry’aho rutuye, bityo ko azakomeza kwitabira ibikorwa biteganyijwe, ati: “Nishimiye kuba ndi mu rubyiruko rwitabiriye iki gikorwa, kuko biduha amahirwe yo kugira icyo dukorera abaturage. Nzakomeza gutanga umusanzu wanjye muri ibi bikorwa biteganyijwe muri uku kwezi kose, cyane cyane mu gufasha abatishoboye no mu bikorwa bigamije guteza imbere aho dutuye.”
Irasubiza Nehemiah na we yagize ati: “Ibi bikorwa ni ibyacu nk’urubyiruko kandi ni uburyo bwo kugaragaza ko dushobora kugira uruhare mu gukemura ibibazo bibangamiye abaturage. Niteguye gukomeza kwifatanya na bagenzi banjye muri gahunda zose zizakorwa muri uku kwezi, kugira ngo dutange umusanzu ugaragara mu iterambere ry’Akarere kacu.”
Mu Karere ka Rwamagana habarurwa urubyiruko rusaga 134,000, muri rwo abarenga 70,000 bakaba bitabira ibikorwa by’urubyiruko rw’abakorerabushake.
