Perezida wa Repubulika y’u Rwanda, Paul Kagame, yasabye abayobozi gushyira imbere abaturage no kugira uruhare mu gukemura ibibazo bahura na byo, aho kubireka ngo bikomeze kubaremerera kandi hari ibyashoboraga gukemurwa.
Yabivuze kuri uyu wa 2 Ukwakira 2026, ubwo yakiraga indahiro z’abagize Inteko Ishinga Amategeko bashya binjiye mu nshingano, ari bo Senateri Gasamagera Wellars na Depite Niyonshuti Ben, uhagarariye urubyiruko mu mutwe w’Abadepite.
Perezida Kagame yashimiye aba bayobozi bamaze kurahira, abasaba kuzuza neza inshingano biyemeje no gukoresha ubumenyi n’imyifatire ikwiye mu gukorera abaturage, ati: “Abamaze kurahira mu nzego z’inteko ishinga amategeko ndabashimiye, izi nshingano mumaze kurahirira muzazuzuze uko bikwiye. Inshingano rero zisanzwe zizwi, ugiye mu nteko bwa mbere aho aba avuye hari izindi nshingano aba yararimo, kandi zo gukorera abaturage. Abantu bahura n’ibibazo ariko bagomba no kubishakira umuti bihereye ku bayobozi. Kugira ngo inshingano abantu bazuze neza, nanone bagomba gukoresha, kumenya, kubona, n’imyifatire abantu bagomba kugira, ntabwo ari ibyo kuzuza amategeko gusa, birarenze no mu muco usanzwe abantu bagomba kwifata bitanashingiye ku mategeko.”
Umukuru w’Igihugu kandi yashimangiye ko abayobozi badakwiye kureka abaturage ngo bakomeze kwikorera ibibazo bishobora gukemurwa, ahubwo ko bakwiye gushaka ibisubizo hakoreshejwe amikoro ahari.
Ati: “Mukwiye gutekereza abaturage, bareke guhora bikoreye ibibazo n’ibishobora gukemuka, ibikemuka bigomba gukorwa bikava mu nzira ibigoranye bigashakirwa umuti abantu bagafatanya amikoro akenshi aba ahari, iyo atanahagije uhera ku bishoboka ukaba aribyo ukemura ugashakisha andi mikoro aganisha kubyo udashobora gukemura uyu mwanya.”
Perezida Kagame yagaragaje ko inshingano z’abayobozi zitagomba kugarukira ku kubahiriza amategeko gusa, ahubwo ko zikwiye kujyana n’imyitwarire iboneye, ubushobozi bwo kubona ibibazo no kugira uruhare mu kubishakira ibisubizo.
Uyu muhango wabereye muri Village Urugwiro, aho Senateri Gasamagera Wellars na Depite Niyonshuti Ben barahiye imbere ya Perezida wa Repubulika, biyemeza kuzuza inshingano bahawe no gukorera Igihugu.
Senateri Gasamagera Wellars yashyizweho n’ihuriro ry’Imitwe ya Politiki yemewe mu Rwanda, mu gihe Depite Niyonshuti Ben yatowe n’Inama y’Igihugu y’Urubyiruko kugira ngo ahagararire urubyiruko mu mutwe w’Abadepite.
Depite Niyonshuti Ben asimbuye Hon. Vénuste Icyitegetse weguye ku nshingano muri Kamena 2026, naho Senateri Gasamagera Wellars asimbura Donathille Mukabarisa uherutse kwitaba Imana.
