Akarere ka Gatsibo ni kamwe mu turere turindwi tugize Intara y’Iburasirazuba, kabarizwamo uburyo bwinshi bw’imibereho n’ishoramari bushobora kugirira benshi akamaro, Umuyobozi w’aka karere yagaragaje mu ncamake amwe mu mahirwe uwakwifuza kuhashora imari yakwibandaho.
Mu kiganiro yagiranye na MUHAZIYACU, Umuyobozi w’Akarere ka Gatsibo yavuze ko abifuza gukorana n’aka karere bahawe ikaze kugira ngo babyaze umusaruro amahirwe ahari.
Meya Gasana avuga ko mu buhinzi n’ubworozi ari ho hari amahirwe menshi ku ishoramari muri aka karere, cyane cyane ashingiye ku butaka bwiza, bwera kandi bushobora kuboneka ari bunini buhurijwe hamwe.
Yagize ati: “Amahirwe ya mbere abantu bashobora gushoramo imari kandi bakunguka, ni mu buhinzi n’ubworozi. Ubuhinzi n’ubworozi mu karere kacu, ni ibintu umuntu atinginga, ubutaka bwiza, burambuye, ubutaka bukiri bushya, bivuze ko umuntu uwari we wese wakora ubuhinzi n’ubworozi mu karere kacu, yakunguka akabona amafaranga.”
Meya Gasana kandi yakomoje ku mahirwe ari mu gushora imari mu bukerarugendo ku Kiyaga cya Muhazi, nko kubakayo amahoteri n’ibindi byabazanira inyungu.
Muri gahunda y’Akarere ka Gatsibo harimo kubaka imihanda kuri iki kiyaga gikora ku mirenge itatu ya Gasange, Kiramuruzi na Murambi, bizorohereza abashoramari n’abandi bantu, ari naho meya ararika abashoramari kuhatekerezaho.
Yagize ati: “Turimo turareba ubukerarugendo ku Kiyaga cya Muhazi, ubu hari n’igishushanyombonera cyasohotse kigaragaza uko hagomba kuba hameze, hari n’imihanda igiye gutangira gukorwamo, bivuze ko abantu bashoye imari, kubaka amahoteri kubaka za pulaje (plages) kuri Muhazi, ndetse n’amacumbi y’igihe gitoya, bakunguka.”
Meya Gasana yagaragaje ko akarere korohereza abashoramari mu gukorana na ko binyuze mu kubafasha kubona ibikorwaremezo no kubaha nkunganire, yagize ati: “Turaborohereza; hari gahunda ya nkunganire mu buhinzi n’ubworozi ishyirwaho na leta, hari ibikorwaremezo by’amashanyarazi n’amazi tugeza mu mirenge bakoreramo, hari ukubafasha kubona ibyangombwa mu buryo bwihuse, tubaha serivisi nziza, ariko n’ibindi bashobora kuba badukeneraho, bahawe ikaze, twakwicara tukaganira.”
Akarere ka Gatsibo gatuwe n’abaturage 551,164, bikagira aka gatatu mu guturwa cyane mu Rwanda nyuma ya Gasabo na Nyagatare, nk’uko bigaragara mu mibare y’Ikigo cy’Igihugu Gishinzwe Ibarurishamibare (NISR). Ibi rero bitanga amahirwe ku bashoramari yo kubona isoko ku bikorwa ibyo ari byo byose bahakorera, byaba ibishingiye ku buhinzi n’ubworozi, ubukerarugendo ndetse n’ubucuruzi, hakiyongeraho ubuhahirane hagati y’aka karere n’Intara y’Amajyaruguru, babifashijwemo n’umuhanda ubahuza.
Igice kimwe cy’aka karere gikora ku gihugu cya Tanzania kibarizwa muri Pariki y’Akagera, ni akarere gahana imbibi n’uturere twa Kayonza, Rwamagana, Nyagatare na Gicumbi.
