Urubyiruko rwo mu Karere ka Ngoma ruravuga ko rugiye kwegera rugenzi rwarwo, kugira ngo hatazagira ushukwa akabibwamo ingengabitekerezo ya Jenoside ikigaragara muri bamwe muri bagenzi babo muri iki gihe cyo kwibuka ku nshuro ya 31 Jenoside yakorewe Abatutsi 1994.
Rwabigarutseho Kuri uyu wa Gatanu, tariki ya 9 Gicurasi 2025 ubwo mu Karere ka Ngoma haberaga igikorwa cyo kwibuka Abatutsi bari abakozi b’amakomini atanu yahujwe akaba Akarere ka Ngoma, bishwe muri Jenoside yakorewe Abatutsi muri Mata 1994.
Niyonshuti Emmanuel wo mu Murenge wa Kazo, ati: “Dufite umukoro wo guhindura urubyiruko tukabigisha amateka y’Igihugu cyacu, ariko kandi tukagira n’uruhare mu guhagarika ingengabitekerezo ikigaragara mu rubyiruko muri iki gihe twibuka Jenoside yakorewe Abatutsi.”
“Turacyafite urugendo rwo guhindura ibikorwa bibi byakozwe na bamwe muri bagenzi bacu, duharanire kwimakaza umuco wa ‘Ndi Umunyarwanda’ tukubaka n’ubumwe bwacu kuko niyo gahunda Igihugu cyihaye.”
Nyirahoriduha Mabertha, ati: “Amateka yabaye ntabwo azongera ukundi cyane ko byakozwe n’urubyiruko ahanini, ubwo twebwe nkarwo tugomba gushishikariza abana bakiri bato mbese n’urubyiruko muri rusange tubabwira amateka ya Jenoside yakorewe Abatutsi tutayagoretse no kumvisha abana kutumvira ababyeyi babo bagifite ingengabitekerezo ya Jenoside kugira ngo ishire burundu tuyirandurane n’imizi yayo.”
Uhagarariye IBUKA mu Karere ka Ngoma, Biseruka Omar, yagize ati: “Nubwo tumaze imyaka 31 twibuka Jenoside yakorewe Abatutsi turacyafite mu Gihugu no mu bihugu by’abaturanyi abagifite ingengabitekerezo ya Jenoside ndetse banagikomeje kugira icyifuzo cyo gukomeza guhitana ubuzima bw’abarokotse Jenoside ndetse bakaba banabigaragaza hirya no hino mu gihugu.”
Yasabye urubyiruko gukomeza kwirinda ingengabitekerezo ya Jenoside n’icyari cyo cyose cyazana amacakubiri.
Umuyobozi w’Akarere ka Ngoma, Niyonagira Nathalie, yagize ati: “Dufite inshingano zikomeye cyane nk’abayobozi zo kwigisha abakiri bato kuba umwe, kwirinda ivangura iryari ryo ryose ariko birumvikana natwe bigomba guhera muri twe; ivangura bagenzi bacu bakorewe tukariheza tukaryamagana burundu kuko dufite amahirwe yo kuba dufite ubuyobozi bwiza bwatanze umurongo mwiza wo ku umwe no kwimakaza gahunda ya Ndi Umunyarwanda.”
