Abantu bagera kuri 26 mu Mudugudu w’ Umukamba, Akagari k’Umukamba, Umurenge wa Kazo, Akarere ka Ngoma ni bo bamaze kujyanwa kwa muganga igitaraganya nyuma yo kunywa umutobe.
Umutobe bikekwa ko ari wo wabaye imbarutso y’uburwayi bwabo, bawunyoye mu bihe bitandukanye kuva ku wa kabiri tariki 14 Nyakanga 2020, mu rugo rumwe rw’ umuryango wari utangiye gucuruza umutobe mu minsi ya vuba muri uyu Mudugudu w’Umukamba.
Abajyanwe kwa muganga kuri uyu wa Gatanu, ku Kigo Nderabuzima cya Kibungo bose bafite ibimenyetso bahuriyeho birimo kuribwa cyane mu nda no gucibwamo.
Umwe mu banyoye kuri uwo mutobe yabwiye MUHAZIYACU ati: “Umuntu wese wanyoye kuri uwo mutobe rwose twese dufite ibimenyetso bimwe kuribwa mu nda no kuruka. Njyewe mu rugo twese turarwaye, njye na madamu n’abana babiri; madamu we ararembye cyane ubu ari ku kigo nderabuzima cya Kibungo.”
Umunyamabanga Nshingwabikorwa w’Umurenge wa Kazo Nyamutera Emmanuel yabwiye MUHAZIYACU ko ayo makuru y’abanyoye ku mutobe nyuma bakajyanwa kwa muganga ari yo.
Yagize ati:”Aya makuru twayamenye mugitondo,… banyoye umutobe ku muturage witwa Gasana Jean Claude usanzwe acuruza umutobe n’ubushera, ejo rero yari yaranguye umutobe mu Murenge wa Gashanda, Akagari ka Munege,..zari litiro 20, ahageze aracuruza, ndetse na we anywaho, abantu bose baguzeho, na we bwite, bose ni 24, bucya bose rero bafite ikibazo cyo gucibwamo. Muri iki gitondo rero abo bose bajyanywe kwa muganga i Kibungo bari kuvurwa, kandi amakuru ni uko kugeza ubu bose imiti ishobora kuborohereza.”
Kugeza ubu ku gicamunsi cyo kuri uyu wa Gatanu, abarwaye bari bagikurikiranwa n’abaganga ku Kigo Nderabuzima cya Kibungo kandi Ubuyobozi bwemeza ko bose bameze neza, ngo hari icyizere cyo gukira.
Icyakora amakuru MUHAZIYACU yamenye mu masaha y’umugoroba ni uko abarwayi 24 bari bamenyekanye mbere ya saa sita z’amanywa bari banagejejwe kwa muganga, biyongereyeho abandi babiri, ndetse uko amasaha y’umunsi yagiye akura bakarushaho kuremba ku buryo barajwe mu Bitaro bikuru bya Kibungo.
