Ingengo y’imari y’Akarere ka Ngoma ivuguruye y’uyu mwaka wa 2022/2023 yiyongereyo amafaranga y’u Rwanda abarirwa muri 3,674,986,438 ahwanye na 13%.
Mu busanzwe ingengo y’imari yo ku itariki ya 1 Nyakanga 2022 yari 24,973,822,552 FRw mu gihe ivuguruye yemejwe ari 28,648,808,960 FRw
Kuri uyu wa Gatanu,tariki ya 3 Werurwe 2023,ubwo ubuyobozi bw’Akarere ka Ngoma bwamurikiraga ingengo y’imari mu nama Njyanama ya Karere, bwavuze ko ayiyongereyo yaturutse mu bikorwa bitandukanye.
Perezida w’Inama Njyanama y’Akarere ka Ngoma,Banamwana Bernard yagize ati:”Ku bijyanye n’ingengo y’imari ivuguriye nta mushinga mushyashya winjiyemo, nta n’uwemejwe ubushize wagiyemo ariko twagize izamuka ry’ingengo ingana na 3,674,986,438 FRw, ahanini bikaba byatewe n’amafaranga yavuye mu zindi nzego za Leta yaje yiyongera ku yo twemeje umwaka ishize.”
Akomeza agira ati: “Igice kinini ku mafaranga yiyongereye ari mu rwego rw’uburezi harimo gufasha imishahara y’abarimu muzi ko yiyongereyo, gufasha amashuri y’imyuga kugira ngo abana babone aho bimenyereza, gutunga abanyeshuri; kubona ifunguro no gufasha ibigo by’amashuri gufata amazi aturuka ku bisenge kugira ngo atangiza ibigo, abaturage n’imirima yabo ahubwo akabyazwa umusaruro.”
Inkunga zituruka ku bikorwa byihariye by’iterambere ni yo igize igice kinini cyayo ifite amafaranga angana na miliyari 8 na miliyoni 758 n’ibihumbi 354 na 333.
Ikindi mu rwego rw’uburezi hari amafaranga yajemo aturutse mu Kigo gishinzwe amashuri y’ubumenyingiro(RTB) agendanye no gufasha ibigo by’amashuri y’imyuga angana na 77,328,405 FRw.
Hateganyijwemo kandi amafaranga y’inyongera ku mishinga ya leta itandukanye nk’inyubazo z’ibyumba by’amashuri n’ibikoni agera kuri miliyoni 96,006,067 Frw, ibikorwaremezo by’imihanda yo muri Kibungo agera kuri miliyoni 5,1 Frw, ayaturutse muri MINUBUMWE angana na 72,500,000 FRw agendanye no gutera inkunga imishinga y’abacitse ku icumu rya Jenoside n’andi.
Muri iyi nama hagarutswe ku bintu bitandukanye harimo ibijyanye no kugaragaza igishushanyombonera cy’imikoreshereje y’ubutaka mu Karere ka Ngoma, aho umukozi wo mu kigo cy’Igihugu cy’ubutaka Kanyamugenge Akimana Adeline yagaragaje ko aka Karere kaberanye n’ubuhinzi ndetse n’ubukerarugendo.
