Abayobozi mu byiciro bitandukanye mu Ntara y’Iburasirasuba bateraniye mu nama igamije kurushaho gufata ingamba zo gukora ubukangurambaga no kwihutisha ishyirwa mu bikorwa rya gahunda za Leta, Imihigo no kubungabunga umutekano w’abantu n’ibintu.
Iyi nama yateraniye mu Karere ka Bugesera kuri uyu wa gatandatu tariki 04 Werurwe 2023, iyobowe na Guverineri w’Intara y’Iburasirazuba CG Emmanuel Gasana.
Aganira n’itangazamakuru, Guverineri Gasana yavuze ko iyi nama ibaye nyuma y’Inama y’Igihugu y’Umushyikirano, uyu munsi bunguranye ibitekerezo bigamije gushyira mu bikorwa imirongi minini yatanzwe igamije guteza imbere umuturage.
Yagize ati: “Nyuma y’Inama Umushyikirano yabaye mwese muzi yayobowe na Perezida wa Repubulika y’u Rwanda, Intara n’Uturere twasanze ari ngombwa kugira ngo twumve neza uko tugiye kujya mu ngamba zo gushyira mu bikorwa imirongo minini yatanzwe yo kwihutisha no gushyira mu bikorwa ibyo twumvikanye, by’umwihariko tugamije guteza umuturage imbere.”
Guverineri Gasana kandi yakomeje agaragaza ahakwiye gushyirwamo imbaraga.
Mu mirongo minini kandi barimo ‘kujya mu ngamba’ kugira ngo bayiteze imbere, ariko umutekano muri rusange, imitangire ya serivisi, kugira umuryango utekanye kandi ushoboye ndetse bakanongeraho uburenganzira bw’umwana.
Ati: “Ikindi twaganiriyeyo dusabwa kugishira mu bikorwa vuba, ni Imihigo ndetse no guteza imbere uburezi mu byiciro byose bishoboka bituma Igihugu cyimakaza ubukungu bushingiye ku bumenyi.”
Iyi nama yahuje Ubuyobozi bw’Intara, Inzego z’umutekano, Inama Njyanama, abagize Komite Nyobozi z’Uturere, abakozi b’uturere bashinzwe itangazamakuru, abahagarariye ibyiciro byihariye, abikorera n’abandi bafatanyabikorwa.
Ibaye kandi mu gihe gito Intara y’Iburasirazuba ibaye iya mbere mu kwesa Imihigo y’umwaka wa 2021 -2022.
