Kuri uyu wa Kane tariki 22 Kanama 2024 mu Murenge wa Kibungo, Akarere ka Ngoma bishimiye umwaka bamaze bakora siporo ikorwa nijoro yiswe “Kibungo Night Run” hatangwa ibihembo ku bafatanyabikorwa bitwaye neza barimo Igorero ry’abagore rya Ngoma, abaturage, Ingabo z’ u Rwanda zikorera i Kibungo, Jibu n’abandi.
Ni siporo ifasha abatuye mu mujyi wa Kibungo kugira ubuzima bwiza no gutambutsa ubutumwa butandukanye ndetse bijyana no kwishimira ibikorwaremezo bahawe nka Sitade n’ imihanda myiza icaniye.
Iyi siporo rusange yatangijwe ku wa Kane, tariki ya 31 Kanama 2023, mu murenge wa Kibungo kuri sitade ya Ngoma, ikaba ikorwa buri wa Kane guhera saa kumi n’ebyiri za nimugoroba.
Kibungo Night Run yitabiriwe n’abaturage benshi batandukanye biganjemo urubyiruko bari kumwe n’inzego z’ubuyobozi zitandukanye, bahurira ahateganyijwe maze bagakora siporo hagamijwe gufasha no gukangurira abantu gukora siporo mu buryo buhoraho, kandi no kubakundisha kwiruka cyane (run), buhoro (Jog) no kugenda n’amaguru (Walk) ndetse n’ubutumwa butandukanye.
Mu bahawe igihembo cy’ishimwe harimo: Umuturage utarigeze usiba na rimwe, Igororero ry’abagore rya Ngoma, Polisi, Ingabo z’u Rwanda, RDF, MTN, Jibu, abatoza bakoreshaga siporo n’abandi.
Umuyobozi w’Akarere ka Ngoma, Niyonagira Nathalie wari wayitabiriye yashimiye abaturage, abafatanyabikorwa n’Umurenge wa Kibungo watangije iyi siporo ikomeje gufasha abawutuye.
Yagize ati: “Hari abatanze amazi n’uyu mwanya murayabona, hari abatoza n’abaganga badufasha gupima indwara zitandura kugira ngo tumenye uko ubuzima bwacu buhagaze kandi cyikaba ari igikorwa gikomeza kandi siporo ni ubuzima.”
Mu bundi butumwa yatanze, yagarutse ku kwirinda icyorezo cy’ubushita bw’inkende.
Ati: “Ubushita bw’inkende mu by’ukuri burahari hari bake nk’uko Minisiteri y’Ubuzima yabitangarije Abanyarwanda, dufite ingamba zo kwirinda.”
Yababwiye ko ubwo bushita nk’inkende bwandurira mu mibonano mpuzabitsina 90%, abwira urubyiruko kandi ko ntaho budafata, ababwira ko bagomba gukaraba intoki bakagira isuku kuko 10% biterwa no kutagira isuku.
