Komisiyo y’Igihugu y’Amatora- NEC yatangaje ko Umukandida wa FPR-Inkotanyi, Kagame Paul, ari we uyoboye urutonde rw’agateganyo mu matora ya 2024 ku mwanya wa Perezida wa Repubulika n’amajwi 99.18%.
Imibare yatangajwe ku manywa yo kuri uyu wa 18 Nyakanga 2024, n’Umuyobozi wa NEC Gasinzigwa Oda, atangaza ibyavuye mu matora ya Perezida wa Repubulika mu buryo w’agateganyo yavuze ko ubwitabire bugera kuri 98.20%.
Mu bakandida ku mwanya wa wa Perezida wa Repubulika, Kagame Paul w’Umuryango FPR Inkotanyi yabonye amajwi 99.18%.
Akurikiwe n’umukandida watanzwe n’Ishyaka Green Party, Habineza Frank wabonye amajwi 0.50%, naho Umukandida wigenga, Mpayimana Philippe yabonye 0.32%.
Abadepite baturuka mu mitwe ya Politike n’Umukandida wigenga
Komisiyo y’Igihugu y’Amatora, NEC, yatangaje ibyavuye mu matora by’agateganyo mu matora y’abadepite baturuka mu mitwe ya politiki n’Umukandida wigenga, aho umuryango FPR-Inkotanyi n’indi mitwe ya politiki bafatanyije bayoboye n’ijanisha rya 68.83%.
NEC yatangaje ko Umuryango FPR-Inkotanyi n’indi mitwe ya politiki bafatanyije ariyo PDC, PPC, PSR, PSP na UDPR babonye ijanisha rya 68.83%.
Bakurikirwa n’ishyaka PL bafite 8.66%, hakurikiyeho PSD babonye 8.62%, DGPR-Green Party babonye 4.56%, PDI yabonye 4.61%, PS Imberakuri babonye 4.51%, naho umukandida wigenga Nsengiyumva Janvier yabonye 0.21%.
Gasinzigwa yashimiye abaturage ku bwitabire bagize mu matora y’uyu mwaka.
Yibukije ko bitarenze tariki 27 Nyakanga 2024, bazatangaza ibyavuye mu matora ya Perezida wa Repubulika n’amatora y’abadepite mu buryo bwa burundu.
