Minisitiri w’Ubucuruzi n’Inganda, Prof. Ngabitsinze Jean Chrysostome yasabye abashoramari bafite inganda mu cyanya cy’inganda cya Bugesera, kugira uruhare mu gukemura ibibazo by’imyubakire idahwitse iteza akajagari ndetse no gufasha abazituriye guhindura imibereho yabo.
Ibi yabigarutseho mu nama Minisitiri w’Ubucuruzi n’Inganda, Prof.Ngabitsinze Jean Chrysostome yagiranye n’abafite inganda mu cyanya cya Bugesera kuri uyu wa kane tariki 09 Gicurasi 2024.
Minisitiri Ngabitsinze yasobanuye impamvu yagiranye inama n’abashoramari bafite inganda mu Karere ka Bugesera zirimo kubashimira ibyiza bakora,kureba imbogamizi bahura nazo.
Yakomeje agira ati: “Hari ibyagiye bivugururwa kugira ngo ubukungu bw’igihugu bugire aho bugera. Ni nayo mpamvu hari icyanya cy’inganda cyihariye cya Bugesera, hari ikindi cya Rilima kizakira inganda ntoya. Ubwo ni uburyo bwo gutanga ibisubizo ku nganda zagiye mu baturage mbere bitewe n’igihe uko cyari kimeze. Rero abanyenganda ntibakwiye kureba gusa iterambere ry’uruganda muri rusange, ahubwo bakwiye kureba ko banazamura abaturiye izo nganda.”
Mvukiyehe Marc wo mu Murenge wa Juru ukora ibikomoka ku ifaririni avuga ko ibiganiro byabahuje na Minisitiri byabunguye byinshi mu mikorere y’ishoramari ndetse ngo bongeye no kwisuzuma ku ruhare bwabo mu guteza imbere abaturage bari hafi y’inganda.
Yagize ati: “Twungutse kunoza umurimo no kuba twagaragaza imbogamizi dushobora guhura nazo kugira ngo ubuyobozi budufashe kuzikemura ubundi tugakomeza kuzamuka mu ishoramari.”
Uwizera fortune ukorera mu ruganda rwa Green Paper rukora ibijyanye n’impapuro zipfunyika mu cyanya cy’inganda cya Bugesera, we yagize ati: “Abayobozi bongeye kutwibutsa kwitwararika kugira isuku kandi tukita ku bidukikije mu nganda zacu ndetse tukubaka bikurikije amabwiriza kugira ngo twirinde amakosa yaduteza akajagari.”
Akarere ka Bugesera gakomeje kwakira abashoramari batari bake baza kubaka inganda zikora ibintu bitandukanye mu cyanya cyagenewe kubakwamo inganda muri aka Karere kiri ku buso bwa hegitari 330.
