Umunyamabanga wa Leta muri Minisiteri y’Ubutegetsi bw’Igihugu (MINALOC), Kayisire Marie Solange, yakanguriye abaturage bo mu Murenge wa Nyakariro kwirinda inzoga z’inkorano zitujuje ubuziranenge, ashimangira ko zifite ingaruka zikomeye ku buzima, ku muryango ndetse no ku iterambere ry’abaturage.
Ubu butumwa yabutanze nyuma y’Umuganda rusange wabereye mu Karere ka Rwamagana aho yaganirije abaturage ku ruhare rwabo mu kubungabunga ubuzima no guteza imbere imibereho myiza y’imiryango.
Kayisire yavuze ko kunywa inzoga z’inkorano, zirimo izizwi nka “dunda ubwonko”, bishyira ubuzima bw’abazinywa mu kaga, bikabangamira n’ubushobozi bwabo bwo kwita ku miryango no kugira uruhare mu bikorwa by’iterambere.
Yagize ati: “Umugabo unywa dunda ubwonko ntabwo aba akiri umugabo. Umuntu uba warabaswe n’izo nzoga akenshi atakaza inshingano ze zo kwita ku muryango, agahora mu makimbirane, ndetse bikaba byamuviramo uburwayi cyangwa urupfu bitewe n’uburozi zishobora kuba buzirimo.”
Uyu muyobozi yasabye abaturage gufatanya n’inzego z’ibanze mu kurwanya abakora n’abacuruza inzoga zitujuje ubuziranenge, anabashishikariza guhitamo ibinyobwa byujuje ibisabwa n’amategeko kugira ngo barinde ubuzima bwabo n’ubw’imiryango yabo.
Yanibukije abaturage ko kubaka Igihugu bitangirira ku muturage ufite ubuzima bwiza, ukora kandi ushoboye gufata ibyemezo bizima, asaba buri wese kugira uruhare mu guca burundu ikoreshwa ry’inzoga z’inkorano mu baturage.
Ubutumwa bw’Umunyamabanga wa Leta muri Minisiteri y’Ubutegetsi bw’Igihugu, Kayisire Marie Solange bwaje bwiyongera ku bukangurambaga bwa Leta bwo kurwanya ibiyobyabwenge n’inzoga z’inkorano bukomeje gukorwa hirya no hino mu Gihugu, hagamijwe kurinda ubuzima bw’abaturage no gukomeza kubaka umuryango Nyarwanda utekanye kandi utera imbere.
