Hashize igihe kirenga umwaka abaturage basaga ibihumbi 40 batuye mu Murenge wa Gahara, mu Karere ka Kirehe bakomerewe no kutagira amazi meza mu murenge wose, ku buryo iyo imvura itari kugwa hari abagura ijerekani imwe y’amazi ya litiro 20 ku mafaranga y’u Rwanda 300.
Ni mu gihe mu mirenge 12 igize Akarere ka Kirehe, ituwemo n’abaturage barenga ibihumbi 360, Umurenge wa Gahara ari wo ufite abaturage benshi basaga ibihumbi 40, ku rundi ruhande ukaba ari wo ukennye ku mazi meza.
Bamwe mu batuye i Gahara baganiriye na muhaziyacu.rw bagaragaza ko kutagira amazi meza ari imbogamizi ikomeye.
Murwanashyaka Jean Pièrre wo mu Kagari ka Nyakagezi, Umudugudu wa Kivogo ati : ”Ikibazo cy’amazi tukimaranye umwaka n’igice. Ubu akagari kose tujya kuvoma epfo iriya mu gishanga, amazi mabi. Iyo imvura itari kugwa nk’ubu izuba ryatangiye kuva ijerekani imwe ya litiro 20 y’amazi tuyihura amafaranga 300. Turasaba ubuvugizi Leta ikaduha amazi meza.”
Naho Dushimirimana Léonille wa Nyagasenyi ati : “Nko muri iki gihe cy’izuba noneho ni ukujya kuvoma iriya hasi Rwagitugusa, utajyayo ukajya kuvoma hepfo ku mutembo mu gishanga. Ahahoze robine zose zarakamye. Iyo imvura iguye twiruka tujya kureka, ariko nk’ubu izuba ryatangiye kuva amazi turi kuyagura, ijerekani amafaranga 200-300FRW.”
Amavomero rusange mu Murenge wa Gahara mu bice bitandukanye arahari yubatswe kera, ariko amazi yarakamye.
Mu kiganiro na muhaziyacu.rw, Munyaneza William Umuyobozi w’ishami rishinzwe ibikorwaremezo, ubutaka n’imiturire mu Karere ka Kirehe yatangaje aho gahunda yo kugeza amazi meza i Gahara igeze.
Ati: “Mu mwaka wa 2019, Akarere ku bufatanye n’Ikigo WASAC twakoze inyigo iremerwa, hatanzwe isoko ryo kubaka ibikorwa by’amazi bizafasha guha amazi mu tugari hafi ya twose, ubu tugeze ku rwego rwo gusinyana amasezerano. Ariko kubera ko iryo soko rirengeje miliyoni 500FRW bisaba ko Minisiteri y’Ubutabera itanga uburenganzira kuri ayo masezerano. Ubu dutegerejwe ko ayo masezerano yemezwa, kugira ngo rwiyemezamirimo atangire ibikorwa.”
Akarere ka Kirehe kagaragaza amasoko azafatirwamo amazi azagezwa i Gahara ari Rubona, Gifunzo, na Kivogo. Na ho ingengo y’imari yagenewe ibyo bikorwa ikaba amafaranga y’u Rwanda agera kuri miliyari imwe na miliyoni 400.
Igihe giteganyijwe ikibazo cy’amazi kizaba cyakemutse ku buryo burambye muri uyu murenge ngo ni mu mwaka wa 2021.
Umuyobozi w’Akarere ka Kirehe, Muzungu Gerald atangaza ko buri mwaka hari ingengo y’imari ishyirwa mu gukemura ikibazo cy’amazi nubwo ngo ikiri nke.
Ati: “Turacyafite ingengo y’imari nkeya ugereranyije n’icyifuzo cy’abaturage kugira ngo bose hirya no hino mu karere bagereweho n’amazi, ariko twabimenyeshe n’inzego zitandukanye z’Igihugu, uko ubushobozi buboneka tuzagenda tuyakwirakwiza.”
Akarere ka Kirehe kagaragaza ko icyigereranyo cy’abaturage ba ko bagerwaho n’amazi meza basaga 70%.
