Abaganga n’abakozi bo mu rwego rw’ubuzima bo mu Karere ka Kirehe banenze bagenzi babo bagize uruhare muri Jenoside yakorewe Abatutsi 1994 aho kurengera ubuzima bw’abarwayi n’abarwaza bagombaga gutabarwa, bagahitamo kwifatanya n’abicanyi.
Ibi byagarutsweho kuri uyu wa Gatanu tariki 29 Gicurasi, ubwo Ibitaro bya Kirehe byibukaga ku nshuro ya 32 Jenoside yakorewe Abatutsi mu 1994 by’umwihariko abari abakozi, abarwayi n’abarwaza biciwe mu bigo by’ubuvuzi byo mu Karere ka Kirehe, mu cyahoze ari Komine Rusumo.
Kwibuka byabimburiwe n’urugendo rwo kwibuka rwavuye ku Bitaro bya Kirehe rwerekeza ku Rwibutso rwa Jenoside rwa Nyakarambi rushyinguyemo imibiri y’Abatutsi basaga ibihumbi 12, aho bunamiye abazize Jenoside banashyira indabyo ku mva.
Hanashyizwe indabo ku rwibutso rwanditseho amazina y’abakozi, abarwayi n’abarwaza bo mu bigo by’ubuvuzi byo muri Kirehe bazize Jenoside yakorewe Abatutsi mu 1994, bagera kuri 15.
Mu kiganiro cyatanzwe ku mateka ya Jenoside, Rwagasana Ernest, yagize ati:“Bavuga y’uko imibare yari ihari hirya igaragaza abaganga bari baraciriwe urubanza mu mwaka wa 2020, abaganga bageraga kuri 68; abo nabemejwe icyaha cya Jenoside, abaforomo ni 89 hirya no hino mu Rwanda.”
Akomeza avuga ko hari abaganga n’abakozi bo mu rwego rw’ubuzima batanze intonde z’Abatutsi bari barwariye mu bitaro, bakazihereza abasirikare n’Interahamwe kugira ngo bicwe.
Yavuze kandi ko hari abakoresheje ibikoresho byo kwa muganga mu gukora ibikorwa by’ubugome n’urw’agashyinyaguro.
Ati: “Hari uwigeze gutera umwana w’Umututsi urushinge mu gutwi agamije kumwica. Yavugaga ko adashinzwe kuvura Abatutsi. Byari ivangura n’ubugome burenze kamere, kuko umuganga yagakwiye gutanga ubuzima aho kubwambura.”
Yakomeje avuga ko Jenoside yagaragaje uburyo urwango rwari rwarashinze imizi no mu nzego zari zikwiye kuba indorerwamo y’ubumuntu.
Mbanzabugabo Emmanuel, uhagarariye imiryango yibukwa muri ibi bitaro, yavuze ko bishimira intambwe Igihugu cyateye nyuma ya Jenoside, nubwo hari benshi bahungiye kwa muganga bizeye kurokoka ariko bakahasanga urupfu.
Ati: “Baratemwe barinda bagana ibitaro kugira ngo bashobore kuhabonera ubuzima ariko aho kububona ahubwo barasonzwe. Turashima ko uyu munsi wa none hari itandukaniro ry’icyo Gihugu cy’icyo gihe n’Igihugu cy’ubu cy’u Rwanda.”
Urubyiruko ruri kwimenyereza umwuga w’ubuganga mu Bitaro bya Kirehe rwavuze ko rwiyemeje kurwanya ingengabitekerezo ya Jenoside no guharanira ko umwuga w’ubuvuzi ukomeza kurangwa n’ubumuntu.
Nabakire Aimé yavuze ko nk’abari kwiga ubuvuzi bafite inshingano zo guha serivisi nziza buri murwayi nta vangura, ati: “Twifuza kubahiriza indangagaciro z’umwuga w’ubuganga, tukavura abantu bose kimwe tutitaye ku bwoko cyangwa inkomoko.”
Umuyobozi Mukuru w’Ibitaro bya Kirehe, Dr. Niyonkuru Ainé Ernest, yavuze ko kwibuka ari umwanya wo kuzirikana amateka Igihugu cyanyuzemo no gukomeza kubaka urwego rw’ubuzima rushingiye ku bumuntu no kurengera ubuzima bwa bose.
Ati: “Jenoside ntiyahitanye abantu gusa, yanangije n’indangagaciro z’umwuga w’ubuvuzi wagombaga kurengera ubuzima bwa bose nta vangura.”
Yakomeje asaba abakora mu rwego rw’ubuzima gukomeza kwimakaza ubumuntu, kurwanya ivangura no gukora ibishoboka byose kugira ngo Jenoside itazongera kubaho ukundi.
Umuyobozi w’Akarere ka Kirehe wungirije ushinzwe imibereho myiza y’abaturage, Mukandayisenga Janvière, yihanganishije abarokotse Jenoside yakorewe Abatutsi, by’umwihariko abafite ababo biciwe cyangwa bahigirwa mu bigo by’ubuvuzi.
Yavuze ko Jenoside yateguwe mu buryo bwageze no mu mavuriro, aho n’abari bakwiye gutabara ubuzima bagize uruhare mu bwicanyi.
Ati: “Umurwayi aba akwiriye kugirirwa impuhwe no kwitabwaho. Kuba Jenoside yarageze no mu bigo by’ubuvuzi ni ikimenyetso cy’ubugome bukomeye Igihugu cyanyuzemo.”
Yakomeje asaba abakora mu nzego z’ubuzima gukomeza kurangwa n’indangagaciro z’Ubunyarwanda, gutanga serivisi nziza no gufata ababagana bose kimwe.
Ati: “Mutange serivise nziza, dufate abatugana bose kimwe tubahe serivise tubavure nibwo n’ibi byose tugenda twiga umunsi ku munsi bizagenda bigaragara ko bigenda bishinga imizi.“
Ubuyobozi bw’Akarere ka Kirehe bwashimiye Ibitaro bya Kirehe uruhare bikomeje kugira mu gufasha abarokotse Jenoside yakorewe Abatutsi, burimo no kugarurira icyizere umwe mu barokotse Jenoside bubakiye inzu ifite agaciro ka miliyoni zisaga 20Frw nyuma y’uko iyo yabagamo yari ishaje igiye kumugwaho.
