Mu mpera z’iki cyumweru mu mirenge itatu ya Kabarondo, Mwiri na Rukara mu Karere ka Kayonza hamenyekanye abana b’abakobwa batatu basambanyijwe, mu basambanyijwe harimo uw’imyaka umunani, abagabo babiri muri batatu bakekwaho iki cyaha bafashwe, umwe aratoroka.
Umukobwa wo mu Murenge wa Mwiri wasambanyijwe afite imyaka 15, ukurikiranyweho kumusambanya ni umusore w’imyaka 20 ariko yatorotse ubu aracyashakishwa.
Mu murenge wa Rukara, umugabo w’imyaka 32 umaze umwaka utuye mu Kagari ka Rwimishinya, we mu mpera z’iki cyumweru yatawe muri yombi akurikiranyweho gusambanya umukobwa ufite imyaka 17 wo mu Murenge wa Rukara akamutera inda, iyi nda yaguye nabi umukobwa ku buryo ubu ngo ari mu bitaro bya Gahini.
I Kabarondo, mu Mudugudu wa Rutagara mu Kagari ka Cyabajwa, mu masaha ya saa kumi n’imwe z’umugoroba wo kuwa gatanu, tariki 20 Ugushyingo, nibwo hamenyekanye ko umuhungu w’imyaka 15 yasambanyije umukobwa w’imyaka umunani, ahagana isaa yine z’ijoro, uyu muhungu yari yamaze gutabwa uri yombi.
Umunyamabanga Nshingwabikorwa w’Umurenge wa Kabarondo, Kagabo Jean Paul yabwiye MUHAZIYACU ati: “Babimenye ari uko umwana abibwiye papa we, papa we ahita amuzana kuri polisi, mu ma saa tatu z’ijoro nibwo bamugejeje kuri polisi.”
Kuri ubu uyu muhungu w’imyala 15 aracyafunze ategereje ibisubizo byo kwa muganga.
