Uwitwa Ngabo Karegeya uzwi nk’Ibere rya Bigogwe kuri Twitter, yatangaje ko yanyuzwe n’uburyo Umuyobozi w’Akarere ka Kayonza John Bosco Nyemazi yamwakiriye ubwo yamusabaga gusura urwuri rurimo Inyambo mu karere ayoboye.
Ni nyuma yo gusura inka z’Inyambo muri amwe mu mafamu yo muri aka karere ku wa Gatandatu tariki 5 Ugushyingo.
Mu butumwa bwa Ngabo Karegeya ati “Nifuzaga gusura inka z’Inyambo mu rwuri bandangira kujya Kayonza, mbikojeje Mayor Bosco Nyemazi ati “nta mwana usaba umubyeyi ngo atitirize ahubwo urakaza neza mu bwatsi bwacu. Kayonza amata abahame ntashye nishimye kandi nyuzwe. URwanda ruzira umwaga.”
Umuyobozi w’Akarere ka Kayonza John Bosco Nyemazi, yasubije Karegeya Ngabo Karegeya ngo “Amata aguhame.”
Ngabo Karegeya amaze kumenyekana ku bwo guteza imbere ubukerarugendo mu Bigogwe mu Karere ka Nyabihu.
Si ibyo gusa kuko anateza imbere umuco ushingiye ku nka. Ibintu bamwe bamushimira cyane.
Kuwa 29 Ukwakira 2022, Uwari Minisitiri w’Ububanyi n’Amahanga, Dr Richard Sezibera yavuze ko agiye gusura Ngabo Karegeya kuko ibyo akora ari byiza.
