Bamwe mu baturage bo mu Ntara y’Iburasirazuba baravuga ko baruhuwe ingendo bakoraga bajya gushaka serivisi z’ubuzima i Kigali, nyuma y’aho Ibitaro bikuru bya Kibungo byongeye gukoresha icyuma cyifashishwa mu kureba uburwayi buri imbere mu mubiri (CT Scan) kimaze gukoreshwa n’abagera ku 7142 kuva muri 2016.
Hari hashize umwaka Ibitaro bikuru bya Kibungo bidagitanga serivisi z’ikoranabuhanga ryifashishwa mu gusuzuma ibice bitandukanye by’imbere mu mubiri w’umurwayi izwi nka ‘Computerized Tomography: CT Scan’ kuko yonge gukora ku wa 11 Kanama 2023.
Kuva yatangira gukora abagera kuri 24 nibo bamaze kuyigana, biyongera ku bihumbi birindwi birenga bamaze kuyikoresha kuva 2016 ubwo Ibitaro bikuru bya Kibungo byayibonaga mu Ntara y’Iburasirazuba yose.
Kugeza ubu muri iyi Ntara nta bindi bitaro bikoresha iri koranabuhanga rya CT Scan ryifashishwa mu buvuzi mu kureba ibice biri imbere mu mubiri bitagombereye kumubaga, rikaba ritandukanye ugereranyije n’ibindi byuma byifashishwa kwa muganga nka ‘Radiography’.
Ni mashini ifasha mu kureba indwara hafi ya zose mu mubiri by’umwihariko indwara z’amagufwa nk’abantu baviriye mu bwonko, uko amaraso agenda mu mubiri, ibibyimba bikomeye n’ibyorohereje, imikaya, inyama zitandukanye ziboneka mu nda no mu gituza (ibihaha, impyiko, umwijima, urwagashya, amara, impindura n’ibindi.)
Bamwe mu baturage bo mu bice bitandukanye by’Intara y’Iburasirazuba babwiye MUHAZIYACU ko baruhuwe ingendo nyuma y’umwaka bagorwa no kubona serivisi zo guca mu cyuma cya CT-Scan.
Umuturage wo mu mudugudu wa Miyaga, Akagari ka Juru, Umurenge wa Gahini, Akarere ka Kayonza, Nyiratebuka Bonfrida, ati: “Naje ku Bitaro bya Gahini nzanye umurwayi urwaye mpageze bamunyujije mu cyuma babona uburwayi butari kurebeka bongera kunyohereza kuri bino bitaro bya Kibungo ariko numvaga batarakoresha icyo cyuma kuko mbere twajyaga i Kigali.”
Undi muturage wo mu murenge wa Sake, Akarere ka Ngoma yagize ati: “Ni ubwa 2 njye kunyuza umurwayi wanjye mu cyuma, gusa amahirwe nagize nuko nasanze gikora, mbere njye naraje bambwira ko kidakora bituma nkoresha amafaranga menshi njya kwisuzumisha ahandi kure ariko turishimye mbega ni nk’igisubizo ku bagorwaga no kubona iyi serivise.”
Inzobere mu by’ubuvuzi zivugako CT Scan, iri mu rwego rwo hejuru kuko ifasha abaganga gusuzuma neza ibice byose by’umubiri mu kanya gato, kandi ikerekana ikibazo aho giherereye.
Ibitaro bikuru bya Kibungo byanazamuwe ku rwego rwisumbuye bikaba ibyo ku rwego rwa kabiri byigisha, bikunze no kwivurizwaho n’abantu bagiye baturuka mu bice bitandukanye by’u Rwanda; biganjemo abo mu Ntara y’Iburasirazuba
Umukozi uhagarariye serivisi zo guca muri CT Scan mu Bitaro bya Kibungo, Bunani Jean De la Paix, yavuze ko kuva serivisi zo guca mu cyuma cya Sikaneri zahagarara, byasubije inyuma imitangire ya serivisi muri rusange.
Yagize ati: “Umwaka ushize nibwo CT Scan yagize ikibazo kiri tekenike, ntiyashobora gukomeza gukora gusa hashize iminsi itangiye gukora, turabona bigenda neza kuko mbere yuko ihagarara byaje gusa nk’aho bisubiza inyuma serivisi zacu, byaratugoye kubona uburwayi mu buryo bwihuse, twohereza abantu benshi, tugira ibihombo bitandukanye byo kohereza abarwayi hirya no hino rimwe ntibanajyeyo.”
Akomeza avuga ko ari kintu cy’ingenzi, cyari gikenewe ku bitaro nk’ibi byoherezwaho abarwayi bavuye mu mavuriro atandukanye.
Yagize ati: “Muri iki gihe ubwo icyuma cyagarutse gukora turabona ko bidufasha kandi mwabonye ko abarwayi bategereje iyo serivise kandi na bo baravuga ko banezerewe kuba iyo serivise bayibonera hafi. Iyi CT Scan iraboneka ari imwe mu Ntara y’Iburasirazuba bivuze ko umurwayi wayandikiwe agomba kuyikoresha hano; nko ku munsi twakira abarwayi hagati ya 20-30.”
Ubu bwoko bw’imashine za ‘CT Scan’ mu Rwanda zibarizwa mu bitaro bikuru bitandukanye birimo, Ibitaro bya Kibungo, ibya Kibuye, Ibyitiriwe Umwami Faisal, Ibya Gisirikare biri i Kanombe, Ibitaro bya Kaminuza bya Kigali n’ibya Butare.
