Abagore bo mu Karere ka Gatsibo bamuritse gahunda za “Ndakumva shenge” na “Tugendane” nk’udushya tugamije kuzabafasha kwesa imihigo. Ni mu nteko rusange y’ inama y’igihugu y’abagore-CNF yahuje abagore bahagarariye abandi kuva ku rwego rw’Akagari kugeza ku karere.
Ni inteko yateranye kuri uyu wa 17 Kanama, yari igamije kumurika uko imihigo ya 2021_2022 yeshejwe ndetse no kwerekana imihigo mishya y’uyu mwaka wa 2022-2033.
Umuhuzabikorwa w’inama y’igihugu y’abagore mu Karere ka Gatsibo Bishyika oliva yagaragaje uko imihigo yesejwe ndetse n’iyo bahize.
Yagaragaje kandi gahunda y’ubukangurambaga bise “Ndakumva shenge “aho bazabarura ingo zibanye neza ndetse n’izibanye mu makimbirane. Avuga ko ingo zibanye neza zizafasha abayobozi mu gukemura ibibazo byo mu miryango itabanye neza.
Yavuze kandi ko hari indi gahunda bise “Tugendane” aho bazategura igikorwa byo gukora isuku, gitangirizwe mu murenge watoranyijwe, hanyuma abandi bawurebereho.
Yakomeje agira ati: “Nitumara gukemura amakimbirane mu miryango tukimakaza isuku ndizera ko n’ibindi tuzabigeraho.”
Abagore bitabiriye iyi nteko rusange bavuze ko bayungukiyemo byinshi, aho ngo bagiye gukosora byinshi bagakora neza kurushaho.
Ugirikirezi Antoinette umwe mu bagore bitabiriye iyi nteko rusange y’abagore yavuze ko agiye guhugura bagenzi be kubyo bigishijwe kd bagakosora aho bitagenze neza.
Umuyobozi w’Akarere ka Gatsibo Gasana Richard yibukije abagore bitabiriye iyi nteko rusange uruhare rw’umugore mu iterambere ry’umuryango aho yerekanye uko imirenge igenda irutanwa ku bijyanye n’iterambere ry’umuryango ndetse n’isuku n’isukura.
Akarere kahembye Umurenge wa Murambi nk’uwahize iyindi, aho bubatse icyumba kihaniro bakemuriramo ibibazo bafite.
Depite Uwamahoro Berthilde wari umushyitsi mukuru yasabye abagore bitabiriye iyi nteko rusange ko bagomba gukora cyane bagafatanya muri byose, ati: “Turasabwa gukora cyane, tugafatanya, tugakora ubuvugizi kugira ngo tugire uruhare mu iterambere ry’igihugu cyacu.”
Yakomeje avuga ko bagomba kuba umusemburo w’ibyiza bagakemura ibibazo byugarije umuryango biba inzitizi mu iterambere ry’igihugu muri rusange.
