Ikipe ihuriweho n’uturere twa Ngoma na Kirehe, Etoile de l’Est mu mukino wa kabiri wa gishuti yakinnye na Sunrise FC yayitsinze igitego kimwe ku busa(1-0) mu mukino yabanje no kwerekana abakinnyi izakinisha mu cyiciro cya Kabiri cy’umupira w’amaguru mu Rwanda muri 2024-2025.
Uyu mukino watangiye Saa Cyenda zirengaho iminota 10, ubanzirizwa no kwerekana abakinnyi Etoile de l’Est yari yakiriye uyu mukino izakinisha mu mwaka wa 2024-025.
Umukino wa gishuti ubanza nawo ikipe ya Etoile de l’Est yari yatsinze ibitego 3-0 Sunrise FC i Nyagatare.
No kuri uyu wa Gatatu, Ikipe ya Sunrise FC yongeye gukina umukino wa gishuti n’ikipe ya Etoile de l’Est i Ngoma birangira itsinzwe igitego 1-0. Ni igitego cyatsinzwe na Salim Saleh ku munota wa 26’.
Etoile de l’Est yo mu Karere ka Ngoma na Sunrise FC yo mu Karere ka Nyagatare nizo zamanutse mu Cyiciro cya Kabiri nyuma yo gutsindirwa ku bibuga byazo, imbere y’abafana ndetse zamanutse ku mukino wakinywe ku ya 11 Gicurasi 2024.
Urutonde rw’abakinnyi Etoile izakinisha umwaka 2024-025
Abanyezamu ni bane barimo Habineza Fils François wahoze akinira Etoile, Shyaka Regis yahoze muri Vision, Habineza Samuel yahoze muri Muhazi United na Tuyizere wahoze muri Etoile de l’Est.
Ba myugariro(Defender) barimo bane bahoze muri Etoile nka Kanani Aboubakar, Rwema Amza, Ruzibiza Prince, Umuhire Aime na Turatsinze John, naho Kwibuka Shumbusho Aphrodis yavuye muri Muhazi United na Shyaka Claver wavuye muri Sunrise FC.
Abakinnyi bakina hagati bazifashishwa muri 2024-025 ni Niyomufasha Gaston wavuye muri Addax, Habamahoro Vincent wavuye muri Sunrise FC na Murengezi Rodrigue wavuye muri Espoire.
Abataka n’abanyura mu mpande barimo barindwi bahoze muri iyi kipe nka Irambona Fabrice, Sadick Sulley, Hakizimana Tity, Iradukunda Abdoul, Muhoza Daniel, Niyoshuti Yusuf, Godspower Gabriel na Ishimwe Benjamin wavuye muri Interforce.
Mu bandi harimo Niyibizi Vedaste wavuye muri Sunrise FC, Munyemana Alexandre wavuye muri Muhanga FC, Aderogba Adejare Festus wavuye muri Lajeunesse, Kalisa Samuel wavuye muri Interforce na Salim Saleh wavuye muri Espoire.
Umutoza mukuru Etoile de l’Est izakoresha ni Muvunyi Felix, umutoza wungirije ni Bingabo Akim naho Niyorurema Desire ni we uzajya utoza abanyezamu; umuganga ni Ntihemuka David naho umenya ubuzima bw’ikipe(Team Manager) ni Gisa Jean Bosco.
