Ku bufatanye bwa Polisi ikorera mu Karere ka Bugesera n’Ubuyobozi bashyikirije Nyirabanani Faina utuye mu Murenge wa Musenyi utaragiraga aho kuba inzu ifite agaciro ka miliyoni Icyenda z’amafaranga y’u Rwanda, mu gikorwa cyabaye kuri uyu wa 28 Ukuboza.
Nyirabanani wahawe inzu, mu mvugo yuzuye ibyishimo yavuze ko ashimira Ubuyobozi bukuru bw’Igihugu bwashyizeho politiki yo kwita ku baturage, ashimira ubuyobozi bw’akarere bwamubaye hafi ndetse na Polisi y’u Rwanda yamwubakiye inzu muri gahunda y’ukwezi kwahariwe ibikorwa byayo,
Yagize ati: “Ndumva byandenze! Ndashimira Perezida Kagame wankuye mu icumbi, ndashinira Ubuyobozi bw’Akarere bwambaye hafi, nkashimira Polisi yanyubakiye inzu ndetse nkashimira inzego zose zambaye hafi.”
Ahobangeze Theogene utuye mu Mudugudu wa Cyarubazi, Akagari ka Gicaca, mu Murenge wa Musenyi, ni umuturanyi wa Nyirabanani wahawe inzu, yabwiye MUHAZIYACU ko nk’abaturanyi baturanye n’uyu muryango, bishimiye iki gikorwa Polisi yakoze cyo gutuza uyu muryango wa Nyirabanani utaragiraga aho uba,
Ati: “Mu bigaragara iki ni igikorwa cyo gushima pe! Uyu muryango wari ukwiriye gufashwa. Rero natwe nk’abaturanyi twishimiye ko uyu muryango utujwe heza kandi ugahabwa ibyangombwa byuzuye.”
Umuyobozi w’Akarere ka Bugesera Mutabazi Richard yashimiye Polisi y’Igihugu ku bikorwa ikora byo kwita ku mibereho y’umuturage nyuma y’inshingano zitoroshye zo gucunga umutekano w’Igihugu.
Yagize ati: “Ndashimira Polisi y’u Rwanda kuba hejuru y’inshingano ifite zo kurinda umutekano wacu, umutekano w’Abanyarwanda, irenzaho ikavuga iti ‘dukore n’ikindi gikorwa cyafasha umuturage kubaho neza’.”
Mutabazi kandi yakomeje avuga ko kuba umuntu afite umutekano uhagije bireberwa mu bintu byinshi harimo ko kuba nta muntu uhohotera undi, kuba umuntu aba afite aho kuba; ko kandi hari n’umutekano wo kuba umuntu aba afite amafunguro ahagije.
Mu bindi bikorwa byakozwe na Polisi muri aka Karere ka Bugesera muri uku kwezi, harimo kugeza umuriro w’amashanyarazi uturuka ku mirasire y’izuba ufite agaciro ka miliyoni esheshatu ku ngo 177.
