Ubuyobozi bw’Akarere ka Bugesera bwagaragaje ko umubare w’abana bitabira kujyanwa mu ngo mbonezamikurire y’abana ( ECDs) umaze kwiyongeraho hafi 50%, aho uyu munsi mu ngo 1843 zigiramo abana basaga ibihumbi 60 bavuye ku bana ibihumbi 31 bo muri 2019.
Ni imibare yagaragajwe kuri uyu wa gatatu tariki 24 Gicurasi 2023, ubwo mu Murenge wa Ngeruka hiziririzwaga umunsi wo gusoza icyumweru cyahariwe imbonezamikurire y’abana bato mu Karere ka Bugesera.
Umuyobozi w’Akarere ka Bugesera wungirije ushinzwe imibereho myiza y’abaturage, Imaninshimwe Yvette, yagaragaje ko serivisi zitangwa mu ngo mbonezamikurire zigamije kurera umwana neza no kumurengera.
Ati: “Abana bose bari mu ngo mbonezamikurire zo mu karere kacu bahabwa serivisi zose zitangwa mu ngo mbonezamikurire, zirimo imirire mu buzima, isuku n’isukura, umutekano gukangura ubwonko bw’umwana ndetse n’uburere buboneye. Muri iki cyumweru hakozwe ibikorwa biganisha ku burere bw’umwana no kumurengera. Twabonye ko serivisi yo gukangura ubwonko bw’umwana itangwa neza ndetse n’izindi n’izindi serivisi.”
Tuyizere Julienne wo mu Murenge wa Ngeruka ni umubyeyi w’abana batatu ufite umwana urererwa mu rugo mbonezamikurire ruri mu Mudugudu wa Gateko mu Kagari ka Kindama, avuga ko gahunda y’ingo mbonezamikurire yazamuye urwego rw’uburere bw’abana babo mu mikurire no mu bwonko kandi ko binabafasha kuba bakora imirimo itandukanye neza ngo kuko babona aho basiga abana babo kandi hizewe umutekano.
Ati: “Ingo mbonezamikurire zidufasha kubona aho dusiga abana bacu kandi hafite umutekano kuko haba hari ababyeyi nkatwe baba bashinzwe kubitaho umunsi ku munsi. Ikindi kandi uretse no kubona bafite aho basigara tukajya mu mirimo, binafasha abana bacu gukanguka mu bwonko ku buryo umwana atangira ishuri agahita amenyera uko biga n’uko bitwara mu myigire y’abanyeshuri.”
Mujawaremye Yvette nawe ufite umwana urererwa mu rugo mbonezamikurire rwo mu Kagari ka Nyamata Ville mu Mudugudu wa Nyabicumu, we abona ko iyi gahunda y’ingo mbonezamikurire y’abana bato yafashije ababyeyi bafite amikoro make ngo kuko baba badafite abakozi mu ngo zabo, akavuga ko ari uburyo buborohereza kubona abo abana babo basigara kandi hizewe.
Ati: “ubu buryo mbona bwaraje nk’igisubizo ku miryango ikennye kuko biba bigoranye kubona aho usiga umwana kugira ngo ubone uko ujya gushakisha ibitunga umuryango. Iyo witegereje usanga ko bidufasha mu kubona umwanya wo gukora tukabona uburyo bw’imibereho tutagowe no kubura aho dusiga abana bavu.”
Guverineri w’Intara y’Iburasirazuva CG Emmanuel Gasana wari witabiriye umuhango wo gusoza ku mugaragaro icyumweru cyahariwe imbonezamikurire mu karere ka Bugesera, yasabye abafite mu nshingano gukurikirana no guteza imbere gahunda y’imbonezamikurire mu bana bato gukomatanya gahunda yo kubaka umuryango ushoboye kandi utekanye ndetse no kurengera umwana, agaragaza kandi ko kugira ngo ibyo bigerweho bireba buri ngeri z’abantu bose.
Icyerekezo cya Guverinoma y’u Rwanda 2050, ni ukugira ubukungu bw’ubakiye ku bumenyi. Nk’Akarere ka Bugesera igicumbi cy’ubukerarugendo n’ubumenyi, kari gushyira imbaraga mu bana bato bitabira serivisi za ECD n’ubukangurambaga ku babyeyi batwite bitabira serivisi zo kwa muganga, hatangijwe gahunda y’urugo mbonezamikurire (ECD program) mu Mudugudu nka bumwe mu buryo buzafasha kuzamura ubukungu bushingiye ku bumenyi.
Ingo mbonezamikurire y’abana bato zitezweho ukuzamura imikurire, gutanga serivisi ku bana ndetse n’ubukangurambaga ku babyeyi bigishwa uruhare rwabo mu mikurire y’abana, bakangura ubwonko bwe ndetse no kumutegurira indyo y’uzuye, bityo bizagirire umumaro umwana ndetse n’igihugu muri rusange mu iterambere.
