Ubuyobozi bw’Akarere ka Kirehe buravuga ko nubwo hari intambwe imaze guterwa mu kugeza amazi meza ku baturage, hakiri icyuho kuko 18% by’abatuye aka karere bataragerwaho n’iyi serivisi yo kwegerezwa amazi meza; bigatuma hari bamwe bagorwa no kujya kuvoma kure.
Ibi byagarutsweho mu nama y’abafatanyabikorwa b’Akarere ka Kirehe yabaye muri iki gihe cyo gusoza umwaka w’ingengo y’imari wa 2025-2026 , hagamijwe kurebera hamwe aho ibikorwa by’iterambere bigeze no gutegura igenamigambi rihuriweho ry’umwaka utaha.
Imibare yagaragajwe muri iyi nama yerekana ko muri aka karere abaturage 6.7% ari bo bafite amazi mu ngo zabo, mu gihe 75.3% babasha kuyabona muri metero 500 zemewe n’amabwiriza ya Leta. Icyakora, abaturage 18% bo baracyafite ikibazo cyo kutabona amazi meza hafi yabo, bamwe bakaba bagikoresha amazi yanduye ava mu bishanga no mu bindi byanya bidatunganyijwe.
Atangiza iyi nama, Umunyamabanga Nshingwabikorwa w’Akarere ka Kirehe, Ndahiro Richard, yavuze ko ubufatanye hagati y’Akarere n’abafatanyabikorwa ari ingenzi mu gukemura ikibazo cy’amazi meza.
Yagize ati “Ni nama dukora buri gihe iyo turimo gusoza umwaka kugira ngo turebere hamwe ibyo twagezeho n’abafatanyabikorwa bacu ndetse tunategure ibikorwa by’umwaka utaha. Abafatanyabikorwa bakorera mu nzego zitandukanye zirimo uburezi, amazi n’isuku, ingufu n’izindi, bityo bikaba ngombwa ko duhuriza hamwe imbaraga mu igenamigambi rigamije guteza imbere abaturage.”
Gitifu Ndahiro yavuze ko amazi ari kimwe mu bikorwaremezo by’ibanze Igihugu cyashyize imbere muri gahunda ya 2 y’Igihugu yo Kwihutisha Iterambere (NST2), igamije ko mu mwaka wa 2029 Abanyarwanda bose bazaba bagerwaho n’amazi meza.
Yagize ati: “Kugera kuri iyo ntego bisaba imbaraga za Leta n’iz’abafatanyabikorwa. Dufite imiyoboro y’amazi iteganyijwe kubakwa mu mwaka utaha, ariko ntabwo izahita ikemura ikibazo cy’abaturage bose badafite amazi meza. Ni yo mpamvu dukeneye ko buri mufatanyabikorwa areba uruhare ashobora kugira kugira ngo iki cyuho kigabanyuke.”
Yagaragaje ko imihindagurikire y’ibihe ndetse n’ubuke bw’umutungo ushorwa mu bikorwa by’amazi biri mu mpamvu zikomeje gutuma hari abaturage bataragerwaho n’amazi meza.
Ubushakashatsi bwamuritswe muri Mata 2025 bwagaragaje ko Abanyarwanda bagerwaho n’amazi meza bageze kuri 90%, bavuye kuri 87% mu mwaka wa 2017. Intego ya NST2 ni uko mu 2029 abaturage bose bazaba bagerwaho n’amazi meza n’ibindi bikorwaremezo by’isuku.
Uhagarariye Ayateke Star Company ishinzwe gucunga imiyoboro y’amazi no gutanga serivisi zo kuyacuruza muri Kirehe, Gakwerere Josam, yavuze ko ikibazo cy’amazi gikunda kwiyongera cyane mu gihe cy’impeshyi.
Yagize ati: “Mu gihe cy’izuba amazi y’amasoko turimo gukoresha aragabanuka cyane, nyamara abayakeneye bakiyongera. Aborozi, abaturage n’ibindi bikorwa bitandukanye byose biba bikenera amazi menshi. Ibi bituma habaho isaranganya ry’amazi make ahari, abaturage bamwe ntibayabone uko bikwiye.”
Abaturage bavuga ko kutabona amazi meza bikomeje kubagiraho ingaruka. Mukamusoni Beatrice wo mu Kagari ka Ntaruka, Umurenge wa Nasho, yavuze ko hari ingo nyinshi zitaragerwaho n’amazi meza.
Ati: “Mu gihe gishize hari bamwe mu baturage babonye amazi nyuma y’uko ubuyobozi budusuye, ariko si bose. Nkanjye sindayabona, kandi iyo dukoresheje amazi mabi rimwe na rimwe bitera indwara nk’impiswi. Twifuza ko natwe twakwegerezwa amazi meza.”
MU ntego za Leta, harimo ko abaturage bo mu cyaro badakwiye gukora urugendo rurenze metero 500 bajya kuvoma amazi meza, mu gihe abatuye mu mijyi bo batagomba kurenza metero 200.
Ubuyobozi bw’Akarere ka Kirehe buvuga ko gukemura ikibazo cy’abaturage 18% bataragerwaho n’amazi meza biri mu byihutirwa, kugira ngo intego y’Igihugu yo kugeza amazi meza kuri bose mu 2029 izagerweho.
