Urwego rw’Igihugu rw’Ubugenzacyaha-RIB rwerekanye abantu 11 bakekwaho kwiba insinga z’amashanyarazi no kwangiza ibikorwaremezo by’amashanyarazi, izibwe zikaba zifite uburemere bwa toni imwe n’igice n’agaciro gasaga miliyoni 20 z’amafaranga y’u Rwanda.
Aba bakekwa berekanywe kuri uyu wa Kabiri, tariki ya 3 Ugushyingo 2026 mu Mujyi wa Kigali. Umuvugizi wa RIB, Dr. Murangira Thierry, yavuze ko izo nsinga zibwe mu bihe bitandukanye mu turere twa Gasabo, Nyarugenge, Kicukiro, Kamonyi na Bugesera.
Yasobanuye ko abafashwe bakurikiranyweho ibyaha birimo kurema umutwe w’abagizi ba nabi, kwangiza ibikorwaremezo n’ubujura. Kugeza ubu bafungiye kuri sitasiyo za Polisi za Kicukiro na Nyarugenge, mu gihe dosiye yabo yamaze gushyikirizwa Ubushinjacyaha.
Muri abo 11 berekanywe harimo babiri bikekwa ko bakomoka muri Uganda.
Mu Rwanda, kwangiza cyangwa gusenya ibikorwaremezo ku bushake ni icyaha giteganywa n’Ingingo ya 182 y’Itegeko Nº 68/2018 ryo ku wa 30 Kanama 2018 rigena ibyaha n’ibihano muri rusange.
Iyi ngingo ivuga ku kwangiza cyangwa gusenya ku bw’inabi inyubako n’ibikorwaremezo bitari iby’uwabikoze, birimo ibiraro, ingomero, imiyoboro y’amazi, ibikoresho by’itumanaho n’ibikoresho by’ingufu z’amashanyarazi.
Uhamijwe n’urukiko iki cyaha ahanishwa igifungo kiri hagati y’imyaka itatu n’itanu, hakiyongeraho n’ihazabu.
Iyo kwangiza ibikorwaremezo biherekejwe n’ubujura bw’ibikoresho bibigize, uwabikoze ashobora no guhanishwa ibihano biteganywa n’amategeko ku cyaha cy’ubujura, nk’uko biteganywa mu ngingo za 166 na 167 z’iryo tegeko.
