Umusore witwa Gasore Sharif w’imyaka 22 wo mu Mudugudu wa Kayenzi mu Kagari ka Karambi mu Murenge wa Muhazi mu Karere ka Rwamagana yaguye mu kiyaga cya Muhazi, aho yari yagiye koga na bagenzi be babiri.
Kuva mu masaha ya saa tanu n’igice z’amanywa ubwo yarohamaga ageze mu kiyaga hagati kugeza saa kumi n’igice ubwo MUHAZIYACU yavuganaga n’ubuyobozi bw’umurenge wa Muhazi, umubiri w’uyu musore wari utaraboneka.
Kinyamahanga Jackson, umuyobozi ushinzwe irangamimerere n’ibibazo by’abaturage mu Murenge wa Muhazi, yagize ati: “Bogaga ari batatu, boga basa nk’abashaka kwambukiranya Muhazi, bageze hagati we ararohama.”
Ngo baturukaga ku ruhande rw’Akagari ka Karambi bagana ku ruhande rw’Akagari ka Byeza.
Nyuma y’uko abo bari kumwe bibananiye kumubona, abandi baturage bazi koga bakagerageza bikanga, ubu aho bigeze akomeje gushakishwa n’abashinzwe umutekano wo mu mazi (marines).
Hakurikijwe amasaha yamaze ari munsi y’amazi nta mahirwe ahari y’uko yaba akiri muzima.
Gasore yari umunyeshuri muri Kaminuza ya ULK y’i Kigali. Yabaga i Kigali ariko ngo hari hashize iminsi mike avuye i Kigali aje gusura umuryango we i Karambi.
