Polisi y’u Rwanda yatangaje ko yatangiye ibikorwa byo gushakisha Kayihura Charles, umugabo wo mu Murenge wa Rukumberi mu Karere ka Ngoma, nyuma y’amakuru avuga ko yaba yararohamye mu Kiyaga cya Birira.
Aya makuru yamenyekanye ku wa 9 Kamena 2026, ubwo abaturage bo mu Mudugudu wa Bare, Akagari ka Rwintashya, babonaga imyenda n’inkweto bivugwa ko ari ibya Kayihura Charles biri mu bwato bwari hagati mu kiyaga, ariko nyirabyo akaba atagaragara aho yari ari.
Nyuma yo kubona ibyo bimenyetso, abaturage bahise bamenyesha inzego zibishinzwe kugira ngo hakorwe iperereza no gushakisha icyo yaba yabaye.
Umuvugizi wa Polisi y’u Rwanda mu Ntara y’Iburasirazuba, SSP Hamdun Twizerimana, yemeje aya makuru avuga ko ibikorwa byo gushakisha uyu muturage byahise bitangira.
Yagize ati: “Twahawe amakuru n’abaturage ko kuri uyu munsi babonye imyenda n’inkweto z’uwo muturage hafi y’ikiyaga, ariko ntawuhamya ko yamubonye aguyemo. Kuri ayo makuru twabonye, twohereje Polisi ishami rishinzwe umutekano wo mu mazi hatangiye ibikorwa byo gushakisha ngo turebe ko uwo muntu yaba yarohamye.”
Polisi ivuga ko kugeza ubu hataramenyekana neza icyabaye kuri uwo muturage, ndetse ko iperereza rikomeje mu gihe ishami rishinzwe umutekano wo mu mazi rikomeje ibikorwa byo kumushakisha muri iki kiyaga.
Iki kibazo kibaye nyuma y’igihe gito muri Kiyaga cya Birira havuzwe undi mugabo wahaburiye ubuzima, ibintu bikomeje gutera impungenge abaturage begereye icyo kiyaga.
