Bamwe mu borozi b’inka bo mu Karere ka Nyagatare bavuga ko bakomeje guhura n’igihombo gituruka ku ntanga ziterwa inka zabo ntizifate, ibintu bavuga ko bibadindiza mu rugendo rwo kongera umusaruro ukomoka ku bworozi.
Aba borozi basaba inzego zibishinzwe gukora inyigo ku mpamvu zituma zimwe mu ntanga z’inka zidafata ndetse hakanarebwa uburyo bwo kubegereza intanga zijyanye n’imiterere y’aho bakorera ubworozi.
Kazungu Thomas, umworozi wo mu Murenge wa Rwimiyaga, avuga ko ikibazo cy’intanga zidafata kimutera igihombo kuko hari igihe inka iterwa intanga inshuro irenze imwe ntifate kandi ari ko atanga amafaranga.
Iki kibazo kandi si we wenyine ugifite, ahubwo agihuriyeho n’abandi borozi bo hirya no hino mu Karere ka Nyagatare.
Yagize ati:“Hari igihe inka iterwa intanga inshuro ebyiri cyangwa eshatu ariko ntifate kandi buri gihe tuba twishyuye. Twifuza ko habaho igenzura ryimbitse ry’ubuziranenge bw’intanga, hakanarebwa uko ikirere n’imiterere y’aho dukorera ubworozi bishobora kugira ingaruka ku ifatwa ryazo.”
Undi mworozi mugenzi we yagize ati: “N’iyo intanga ifashe hari ubwo inka ibyara ikimasa kandi twarishyuriye inyana.”
Imibare y’Akarere ka Nyagatare igaragaza ko mu mwaka ushize hashowe amafaranga arenga miliyoni 88Frw mu bikorwa byo kuvugurura icyororo cy’inka ariko ngo izatanze umusaruro zigera kuri Miliyoni 5.
Mu Murenge wa Karangazi, nk’umwe mu mirenge yororerwamo inka nyinshi muri aka Karere mu nka 100 zoshowemo asaga Miliyoni 13 ziterwa intanga, izigera kuri 27 muri zo ni zo zonyine zafashe.
Kanakuze Valens, ukorana n’abaturage mu guteza imbere ubuhinzi n’ubworozi akaba umuhanga mu by’ubworozi, avuga ko uburyo inka zororwamo bugira uruhare runini ku ifata ry’intanga.
Yagize ati “Umworozi uzerereza inka ku gasozi cyangwa se mu ifamu zikabaho zizerera usanga zinanirwa kandi niba zananiwe veterineri naza kuzitera intanga muri cya gihe iri muri wa munaniro nubwo yaba yarinze ya ntanga idashobora gufata.”
Umuyobozi w’Akarere ka Nyagatare w’agateganyo, Kakooza Henry, yavuze ko hafashwe ingamba zigamije kuzamura ireme rya gahunda yo kuvugurura icyororo no kongera ubumenyi bw’aborozi.
Yagize ati: “Twafashe gahunda yo guhugura aborozi bafite amafamu muri buri kagari ndetse n’aborozi ba Girinka kugira ngo bongere ubumenyi ku micungire myiza y’amatungo no kuvugurura icyororo.”
Mu Karere ka Nyagatare habarurwa inka zisaga ibihumbi 208, muri zo izirenga ibihumbi 180 zikaba ari iz’icyororo kivuguruye.
Ubuyobozi buvuga ko gukomeza kunoza gahunda yo gutera intanga no guhugura aborozi bizafasha kongera umukamo no kuzamura umusaruro ukomoka ku bworozi.
