Bamwe mu rubyiruko rwo mu Karere ka Ngoma baravuga ko batishimira uburyo basoza umwaka, aho basaba ko Ubuyobozi ko bwajya bubazanira abahanzi bazwi batandukanye bakidagadurana kimwe nk’uko ahandi bikunda kugenda.
Kuri uyu wa Gatatu, tariki 31 Ukuboza 2025, Urubyiruko rwo mu Murenge wa Kibungo, Akarere ka Ngoma rwasoje umwaka wa 2025 mu gitaramo umurenge wateguye cyo kwishima, aho habyinwe imbyino gakondo, izigezweho, imikino itandukanye harimo n’urwenya.
Urubyiruko rwo muri aka Karere rwabwiye MUHAZIYACU ko rwishimye, ariko hakiri byinshi bagikeneye kugira ngo bajye basoza umwaka neza nk’abandi nko gutumirwa abahanzi bagezweho.
Nsengimana Jean Lambert, ati “Umwaka tuwusoje neza, twataramye twishimye, twabonye ibintu byinshi bitandukanye byiza ariko umwaka utaha turasaba ko byarushaho bagashaka ibindi bintu twageraho biruta ibi bya 2025.”
Ishimwe Kevine, ati: “Byari ibintu byiza twakuyemo inyigisho zitandukanye z’uburyo twakwitwara mu mwaka ugiye kuza n’intego twaba dufite twirinda ingeso mbi ahubwo tukarushaho gukora cyane kugira ngo dutere imbere. Icyo nasoza mvuga n’uko ubutaha bazana abahanzi n’ibindi bituma hashyuha cyane kurushaho.”
Muhire Patrick, ati “Nubwo tuwusoje ariko Ngoma rwose ntabwo tuba twishimye nk’uko ahandi bazana abahanzi, urubyiruko bakishima ariko hano sinzi ibyabo, barebe rwose ukuntu ubutaha bazikosora.”
Umuyobozi w’Akarere ka Ngoma, Niyonagira Nathalie yavuze ko ubutaha bazazana abahanzi urubyiruko rushaka, ati “Ni ibikorwa turi gutegura, uyu munsi byateguwe n’Umurenge wa Kibungo ku bufatanye n’ikigo cy’urubyiruko, abafite impano bose baje kuzigaragza ariko twanabejeje ko tugomba gushaka uburyo tubashimisha kurushaho, nabo babigizemo uruhare ariko tukabazanira abahanzi; turabitegura umwaka utaha bizashyuha kurusha uyu munsi.”
Meya Niyonagira yasabye urubyiruko kwirinda ibisindisha n’ibindi biyobyabwenge, kwitwara neza birinda ingeso mbi z’ubusambanyi n’inda zitateguwe no kwifata muri zino mpera z’umwaka.
Yabasabye kandi kwitegura neza itangira ry’amashuri kuko tariki ya 03 Mutarama 2026 aribwo Ngoma izakira abanyeshuri.
Yasoje yifuriza urubyiruko umwaka mwiza wa 2026.
