Imiryango Umunani(8) yabanaga bitemewe n’amategeko mu Murenge wa Musaza, Akarere ka Kirehe, yasezeranye imbere y’amategeko, mu bikorwa byo gutangiza ubukangurambaga bw’icyumweru cyahariwe kwimakaza ihame ry’uburinganire mu Ntara y’Iburasirazuba.
Imiryango yasezeranye yiyemeje kubaka ingo zirangwa n’ubwubahane n’ubufatanye.
Igikorwa cyo gutangiza ku mugaragaro ubu bukangurambaga cyabaye kuri uyu wa Mbere tariki ya 22 Nzeri 2026, gifite insanganyamatsiko igira iti “Ihame ry’Uburinganire, Inkingi y’Umuryango Ushoboye kandi Utekanye”, kikaba kigamije gukangurira abaturage kubaka imiryango irangwa no kubahana, gufatanya no kurwanya ihohoterwa rishingiye ku gitsina n’amakimbirane yo mu ngo.
Mu Murenge wa Musaza, hanatanzwe serivisi zitandukanye zirimo iz’irangamimerere, gusuzuma indwara zitandura, gufasha abatishoboye borozwa inka no kuganira n’abaturage ku bibazo bibangamira imibereho myiza y’imiryango.
Bamwe mu basezeranye byemewe n’amategeko babwiye MUHAZI YACU ko biyemeje kubaka ingo zirangwa n’ubwubahane n’ubufatanye.
Ntirushwamaboko Athanase, utuye mu Mudugudu wa Nyakiriba, Akagari ka Gasarabwayi, ni umwe mu basezeranye. Yavuze ko nyuma yo gusezerana, we n’umugore we biyemeje kurushaho kubana neza no kurera abana babo mu buryo buboneye.
Aragira ati “Tugiye kubana neza n’abana bacu tubarere neza bakure neza, twubahane. N’uwari ufite igitekerezo cyo kuba yaca inyuma undi abihagarike, kuko kubana bitemewe n’amategeko bishobora gutuma mwacana inyuma. Ariko ubu twumvise impanuro baduhaye, ntawe uzabigerageza. Ni ukubana neza, tukubaka Igihugu cyacu n’umuryango mugari, abana bakabaho neza tukabasha no kubarihira amashuri.”
Umugore we na we yavuze ko kuba umugabo we yemeye ko basezerana imbere y’amategeko ari intambwe yishimiye, kuko bombi babiganiriyeho kandi bakaba biyemeje gukomeza kubahana.
Ati: “Umugabo wanjye ndamwubaha kuba yemeye ko dusezerana byemewe n’amategeko, nanjye biranshimishije. Twese twarabiganiriyeho, rero ibyo avuze ni byo; ni ukubahana tukubaka urugo neza, bitandukanye n’imyaka twari tumaze tubana, kuko hari ibyo tutumvikanagaho.”
Jumapiri Jean d’Amour, na we wasezeranye, yavuze ko kubona umuntu bafatanya murugo bizamufasha gukomeza guteza imbere ibikorwa bye.
Ati: “Gusezerana byemewe n’amategeko bigiye gutuma iterambere nari mfite ryiyongera, rikikuba inshuro nyinshi kubera ko mbonye umuntu dufatanya, unyunganira mu bitekerezo. Urugo rwacu ubu nta makimbirane azarurangwamo cyangwa ibindi bibazo byakomoka ku kuba mutarasezeranye.”
Umuyobozi w’Akarere ka Kirehe, Rangira Bruno, yavuze ko gusezeranya imiryango yabanaga bitemewe n’amategeko ari kimwe mu bikorwa bigamije gukemura ibibazo bikunze kugaragara mu miryango.
Ati: “Ndashima imiryango yashyingiranwe uyu munsi kubera intambwe nziza bateye. Uyu munsi turatangiza ibijyanye n’ubukangurambaga ku buringanire n’ubwizuzanye. Ni igikorwa dukora buri mwaka kigamije kugira ngo duhangane na bya bibazo akenshi duhura na byo ku bijyanye n’uburinganire n’ubwizuzanye, cyane cyane ibibazo dusanga mu miryango.”
Meya Rangira yavuze ko muri iki cyumweru hazibandwa ku bikorwa birimo gufasha imiryango ibana mu buryo butemewe n’amategeko kugira ngo ibashe gusezerana, gukurikirana ko abana bose bandikwa mu bitabo by’irangamimerere, gufasha imiryango iri mu makimbirane kuyakemura ndetse no gukurikirana ikibazo cy’abana baterwa inda.
Harateganywa kandi ibiganiro bigamije kurwanya ihohoterwa rishingiye ku gitsina, gukumira amakimbirane yo mu ngo no gukangurira abaturage kugira uruhare mu kubaka imiryango itekanye.
Muri gahunda z’iki cyumweru kandi harimo kuganira n’abangavu babyaye imburagihe ndetse n’ababyeyi babo, hagamijwe kubagarurira icyizere no kubafasha gusubira mu buzima busanzwe, ndetse no gusubira mu ishuri ku babishoboye.
Kuri uyu wa Mbere tariki ya 21 Nzeri 2026, ni bwo mu Ntara y’Iburasirazuba hatangijwe ubukangurambaga bw’icyumweru cyahariwe kwimakaza ihame ry’uburinganire.
Ibikorwa bizakorwa muri iki cyumweru bigamije gukomeza kubaka imiryango ishingiye ku bwubahane, ubufatanye n’uburinganire, no gukemura ibibazo bishobora kubangamira imibereho myiza y’abagize umuryango; by’umwihariko abana n’abangavu.
