Umunyamabanga Uhoraho muri Minisiteri y’Urubyiruko n’Iterambere ry’Ubuhanzi, Ishungure Parfait, yavuze ko imyitwarire myiza ari ishingiro ry’ubuzima bwiza n’iterambere rirambye, asaba urubyiruko rw’u Rwanda gukomeza kwimakaza indangagaciro z’Ubunyarwanda no kubaka ejo hazaza h’Igihugu rushingiye ku ndangagaciro nziza.
Yabitangaje ubwo yatangizaga ku mugaragaro gahunda y’Intore mu Biruhuko ku rwego rw’Igihugu, yabereye ku Ishuri rya GS St. Aloys riherereye mu Karere ka Rwamagana. Iki gikorwa cyahuje abayobozi batandukanye, urubyiruko n’abafatanyabikorwa muri gahunda zigamije guteza imbere urubyiruko.
Mu butumwa yagejeje ku bitabiriye uwo muhango, Ishungure Parfait yagaragaje ko gahunda y’Intore mu Biruhuko ari umwanya mwiza wo gukomeza gutoza urubyiruko indangagaciro z’ubupfura, ubunyangamugayo, gukunda Igihugu, umurimo unoze n’ubufatanye, bityo rukaba umusingi w’iterambere ry’Igihugu.
Yagize ati: “Imyitwarire myiza ni igishoro cy’ubuzima bwiza. Ni igihe cyiza rero cyo kwibutsa urubyiruko rwacu ko imyitwarire myiza ari ingenzi kugira ngo dukomeze twubake u Rwanda twifuza. Turashishikariza rero ababyeyi kohereza abana muri iyi gahunda y’Intore mu biruhuko kuko ari gahunda y’ingenzi kuri bo, tukaba tubashishikariza kureka abana bakajya hamwe n’abandi bakiga muri iyi gahunda. Ku bana, nabo turabashishikariza kwitabira iyi gahunda kuko bazahigira byinshi haba mu buzima bw’ishuri no mu buzima rusange busanzwe.”
Yakomeje asaba urubyiruko gukoresha neza igihe cy’ibiruhuko, rwitabira ibikorwa birwubaka haba mu myigire, mu bushake, mu bikorwa by’iterambere ndetse no mu kubungabunga umuco Nyarwanda.
Yashimangiye ko Leta ikomeje gushyira imbaraga mu bikorwa biteza imbere urubyiruko, irutegurira kuba abaturage bafite ubushobozi bwo guhanga udushya, kwihangira imirimo no kugira uruhare rugaragara mu rugendo rw’iterambere ry’u Rwanda.
Muri ibi biruhuko, abana n’urubyiruko bazafashwa kwidagadura binyuze mu mikino itandukanye no kuvumbura impano zabo. Hazabaho kandi ibiganiro n’ubujyanama mu ngeri zinyuranye, hamwe n’imikino njyarugamba izabafasha gukarishya ubwenge n’imikorere y’umubiri.
Ingabire Nadine, umwe mu rubyiruko rwitabiriye iyi gahunda, yabwiye MUHAZIYACU icyo izabafasha, ati: “Iyi gahunda, izadufasha kuzamura impano zacu, nko kubyina, gukina basketball, na Volleyball. Imbuga nkoranyambaga tuzazikoresha neza dushyiraho impano zacu nko kubyina Amaraba, tukanashishikariza abandi bana kuzamura impano zabo.”
Gahunda ya Intore mu Biruhuko itegurwa buri mwaka hagamijwe gufasha abana n’urubyiruko gukoresha neza igihe cy’ibiruhuko, binyuze mu biganiro, ibikorwa by’ubwitange, imyitozo ngororamico n’andi masomo agamije kubaka Umunyarwanda ufite indangagaciro, uzi inshingano ze kandi ugira uruhare mu iterambere ry’Igihugu.
Abayobozi bagaragaje ko gukomeza guha urubyiruko uburere bushingiye ku ndangagaciro no ku muco nyarwanda ari imwe mu nkingi zikomeye zo kubaka Igihugu gifite abaturage bafite imyitwarire myiza, bazi icyo bashinzwe kandi biteguye gukomeza gusigasira ibyo Igihugu kimaze kugeraho.
Gahunda y’Intore mu biruhuko yo mu mwaka ushize wa 2025 yitabiriwe n’abana n’urubyiruko basaga miliyoni imwe mu Gihugu hose.
