Bamwe mu rubyiruko rugera kuri 25,506 biteganyijwe ko bazitabira gahunda y’Intore mu biruhuko mu Karere ka Kirehe, baravuga ko iyi gahunda izabafasha kwiga indangagaciro Nyarwanda, kugaragaza impano zabo ndetse bafashwe kwirinda ibiyobyabwenge n’izindi ngeso mbi zabangamira iterambere.
Ibi byagarutsweho na bamwe mu batuye mu Kagari ka Kiremera mu Murenge wa Kigarama mu Karere ka Kirehe ahatangirijwe gahunda y’Intore mu biruhuko ku rwego rw’Akarere ku nsanganyamatsiko igira iti “Imyitwarire myiza, ubuzima bwiza”
Abanyeshuri n’urubyiruko bitabiriye umuhango wo gutangiza iyi gahunda ku kibuga cya GS Nyankurazo bagaragarije MUHAZIYACU ko bayitezeho kubafasha gukomeza kwiyubaka no guteza imbere ubumenyi n’impano bafite.
Sezerano Albert, wiga muri GS Nyankurazo, yavuze ko izamufasha kurushaho gukura mu mitekerereze no gukoresha neza impano ye.
Yagize ati: “Iyi gahunda izamfasha mu kuzamura impano yo gukina umupira w’amaguru, inampe amahirwe yo kurushaho kurangwa n’imyitwarire myiza no kwirinda ibiyobyabwenge.”
Irakoze Benitha na we yavuze ko yishimiye kwitabira iyi gahunda kuko izabafasha gusobanukirwa indangagaciro Nyarwanda no kuzisangiza bagenzi babo.
Ati: “Tuzigamo indangagaciro Nyarwanda zidufashe kwitwara neza nk’urubyiruko, tunarinde Igihugu cyacu twirinda ibikorwa byose byadusubiza inyuma nko gutwita inda zitateganyijwe.”
Umuyobozi w’Akarere ka Kirehe, Rangira Bruno, yasabye urubyiruko gukoresha neza aya mahirwe, asobanura ko Intore mu Biruhuko atari umwanya wo kwidagadura gusa, ahubwo ari ishuri ribafasha kwiyubaka no gutegura ejo hazaza habo.
Yagize ati: “Iyi ni gahunda yanyu. Mugomba kuyibyaza umusaruro mwiteza imbere mu bumenyi, mu muco, mu mikino no mu bundi bumenyi buzabagirira akamaro. Hari abafite impano zitandukanye; uyu ni umwanya wo kuzigaragaza no kuziteza imbere.”
Yakomeje asaba urubyiruko kurangwa n’imyitwarire myiza, kwirinda ibiyobyabwenge n’izindi ngeso mbi, ndetse no kubaha ababyeyi n’ababarera.
Meya Rangira kandi yasabye ababyeyi gukomeza gukurikirana abana babo no kubashyigikira kugira ngo bazitabire gahunda y’Intore mu Biruhuko uko bikwiye, kuko ari imwe mu nzira zifasha kubaka urubyiruko rufite uburere, indangagaciro n’ubushobozi bwo kugira uruhare mu iterambere ry’Igihugu.
Gahunda y’Intore mu Biruhuko itegurwa buri mwaka hagamijwe guha urubyiruko umwanya wo gukomeza kwiyungura ubumenyi, kwimakaza ubunyarwanda, guteza imbere impano no kurushaho kugira uruhare mu bikorwa by’iterambere ry’Igihugu.
