Isuzuma rya ‘Accreditation’ ry’umwaka wa 2022-2023 ryagaragaje ko ibitaro bya Kirehe, Rwinkwavu, Kibungo na Gahini byo mu Ntara y’Iburasirazuba biri mu byatsinze neza mu mikorere n’imitangire ya serivisi ku rwego rwa Level II, mu gihe hari n’ibyasubiye inyuma nk’ibya Rwamagana.
Ni ibikubiye mu biherutse gutangazwa na Minisiteri y’Ubuzima, byagaragajwe n’isuzuma ibitaro byo hirya no hino mu Gihugu ryakozwe kuva muri Mutarama kugeza Mata 2023 ryakorewe mu bitaro 51 mu Rwanda, birimo 44 bari bisanzwe bigenzurwa mu isuzuma rikorwa n’abakozi b’ikigo cyabiherewe uburenganzira cya RAAQH(Rwanda Agency for Accreditation and Quality Healthcare).
Bine mu bitaro 11 byo mu Ntara y’Iburasirazuba byatsinze ku rwego rwa ‘Level II’
Nk’uko biherutse gushyirwa ahagaragara na Minisiteri y’ubuzima tariki 30 Gicurasi 2023 i Kigali, mu bitaro 44 byari bisuzumwe mu mwaka wa 2021-2022 mu Rwanda hose, ibitaro 16 ni byo byonyine byabashije gutsinda neza isuzuma rya ‘Accreditation 2022-2023’ no kuguma ku rwego rwa Level II ; muri ibyo bitaro 16 byatsinze neza harimo mu bine byo mu Ntara y’Ibirasirazuba.
Ku rutonde rusange, ibitaro byo mu Ntara y’Iburasirazuba, ibyaje imbere ni Ibitaro by’Akarere ka Kirehe byabaye ibya 2 mu Rwanda n’amanota 93%, Ibindi bitaro biri hafi ni ibya Rwinkwavu byo mu Karere ka Kayonza biri ku mwanya wa 6 byagize amanota 86%, byakurikiwe n’Ibitaro bya Kibungo Level 2 Teaching byaje ku mwanya wa 7 n’amanota 85%, mu gihe Ibitaro bya Gahini na byo byo mu Karere ka Kayonza biri ku mwanya wa 12 n’amanota 81%.
Naho Ibitaro bya Kiziguro bagize amanota 81%, ibya Ngarama bigira 80% ibi byombi bikaba ari ibyo mu Karere ka Gatsibo, n’Ibitaro byo mu Karere ka Bugesera bya Nyamata Level 2 Teaching byagize amanota 78%, ariko nubwo byagize ayo manota menshi ntibyabashije gutsinda ku rwego rwa ‘Level II’ bitewe n’uko hari ibintu bike ariko by’ingenzi, ibyo bita ‘Critical Standards’ mu bigenzurwa bitabashije gutsinda.
Mu bindi bitaro byo mu Ntara y’Iburasirazuba bitashije gutsinda ku rwego rwa Level II harimo Rwamagana Level II Teaching byasubiye inyuma bitakaza Level II byari bifite umwaka wa 2021-2022; n’ Ibitaro byo mu Karere ka Nyagatare bya Gatunda na Nyagatare byagumye kuri Level I.
Ibitaro bya Rilima mu Karere ka Bugesera byo muri uyu mwaka wa 2022-2023 ni bwo bwa mbere byanzumwe ntibyabasha gutsinda ku rwego rwa Level I.
Mu kiganiro MUHAZIYACU yagiranye na Dr Munyemana Jean Claude, Umuyobozi mukuru w’Ibitaro by’Akarere ka Kirehe ari na byo byaje ku isonga mu Ntara y’Iburasirazuba, aho biri ku mwanya wa kabiri ku rwego rw’Igihugu; yavuze ko biteguye gusigasira ibyagezweho.
Ati:” Bisobanuye ko ibijyanye n’imitangire ya serivisi mu bitaro, imiyoborere n’imicungire y’abakozi n’umutungo, isuku n’isukura mu bitaro n’ibijyanye n’ireme rya serivisi dutanga ko bihagaze neza mu rwego rw’ibitaro mu bipimo byose byagenzuwe; kandi ingamba dufite ni uko ibyagezweho tugomba kubisigasira cyane ko no mu mwaka wa 2021-2022 icyo gihe twari ku mwanya wa 6 ubu muri uyu mwaka twaje ku mwanya wa 2 bivuze ngo ibyo twari twaragezeho twarabisigasiye kandi na gahunda yo kubikomeza n’ubundi iracyahari.”
Dr Munyemana avuga ko ubu icyo bagiye kwitaho cyane ari ukongera kugenzura ibyo bari bakoze ubushize n’ibyo batabashije gukora byatumwe batagera ku mwanya wa mbere bikanozwa, hibandwa ku gushyira umurwayi ku isonga no kumuha serivisi nziza inoze.
Dr Gahima John Umuyobozi mukuru w’Ibitaro bikuru bya Kibungo byo ku rwego rwa Kabiri byigisha(Kibungo L2TH) we yabwiye MUHAZIYACU ko bishimiye kuba baritwaye neza bakongera gutsinda ku rwego rwa Kabiri(Level II) nyuma y’uko umwaka ushize bari batakaje uyu mwanya bagarutseho.
Yagize ati “Mu by’ukuri twabyakiriye neza kubera ko uhora ari umuhigo ukawesa, turabyishimira niyo mpamvu kimwe n’ibindi bitaro byabonye icyo cyiciro twese twarabyishimiye; wenda twebwe twabyishimiye kurushaho kuko twasubiranye ibyo twari dusanganwe, ubwo gahunda ni ugukomerezaho kugira ngo ntituzongere gutakaza urwo rwego rwa kabiri ariko na none bidutera n’akanyabugabo ko kuvuga ko twakora neza kurushaho kuko intego ni ukubona urwo rwego rwa gatatu nk’uko tubisabwa na Minisiteri y’Ubuzima; biradusaba kurushaho gutanga serivisi nziza no kunoza imikorere.”
Ku rundi ruhande rw’ibitabo bitabashije gutsinda mu rwego rwa Kabiri kuko byagumye kuri ‘Level 1’ MUHAZIYACU yavuganye na Dr Eddy Ndayambaje Kajeguhera, Umuyobozi mukuru w’Ibitaro by’Akarere ka Nyagatare avuga ingamba bafite kugira ngo mu isuzuma rya ‘Accreditation’ ubutaha bazabe bahagaze neza.
Yagize ati: “Umwanya twabonye ntabwo wadushimishije kuba twaraje mu ibara ry’umutuku, ubu ingamba zihari ni uko tunoza imikorere, ibintu tukabitangira hakiri kare kandi tugakorana, abakozi bose bakaba babizi bakanabikurikiza, noneho habeho no gukurikirana ko abakozi babikora nk’uko biri mu bitabo kandi n’abaturage tukabaha serivisi nziza kuko nabo hari ibyo baba bagaragaje mu isuzuma. Twiteguye gufata ingamba ndetse ubu twaratangiye; no kunoza imitangire ya serivisi duha abatugana.”
Congratulations to @RwinkwavuO and @HospitalGahini for a well deserved performance recognition of level II Hospital Accreditation. More is possible 👌 pic.twitter.com/rURad0Fvyn
— Nyemazi John Bosco (@BoscoNyemazi) May 30, 2023
Nyuma y’uko hatangajwe amanota y’uko ibitaro byakorewe isuzuma byitwaye, tumwe mu turere turimo ibitaro byitwaye neza nka Kirehe na Kayonza twashimiye ibyo bitaro tubisaba gukomeza kujya imbere mu kunoza imikorere n’imitangire ya serivisi nziza.
Na CG Gasana K.Emmanuel Umuyobozi w’Intara y’Iburasirazuba abinyujije kuri Twitter yagize ati: “Dushimiye cyane ibitaro byo mu Ntara yacu byitwaye neza, bigatsinda neza mu isuzuma.”
Mu Ntara y’Iburasirazuba habarurwa Ibitaro bigera kuri 11, birimo bitatu byo ku rwa Kabiri rw’Ibitaro byigisha[Kibungo na Nyamata na Rwamagana], n’Ibitaro by’uturere byose biri hirya no hino mu turere turindwi tugize iyi Ntara.
Isuzuma rya ‘Accreditation’ rikorerwa ibitaro byo ku rwego rw’uturere, Ibitaro bikuru n’Iby’intara; rikorwa hasuzumwa niba imikorere yabyo ikurikiza umurongo ngenderwaho wanditse kandi ukurikizwa na buri mukozi muri ibyo bitaro, hakanakurikizwa kandi ibipimo byemejwe ku rwego rw’Igihugu no ku rwego mpuzamahanga; ibitsinze kuri uru rwego bihabwa icyo bita ‘Level I’.
Mu gihe kugira ngo Ibitaro bitsinde ku rwego rwa ‘Level II’ bigomba kuba byaratsinze neza cyiciro cya Level I, kandi byaragenzuwe bikagaragaza ko bikurikiza neza ibyanditswe ndetse n’imikorere yabyo ikaba yemezwa n’abakozi babyo n’abarwayi babyivurizaho; hagenzurwamo imikorere y’ibitaro mu nzego zose, guhera ku isuku, ubumenyi n’ubushobozi by’abayobozi n’abakozi, imiyoborere n’imitangire ya serivisi.
Habaho kandi no gutsinda ku rwego rwa ‘Level III’, icyakora mu bitaro 51 byakorewe isuzuma kugeza ubu ntabirabasha gutsinda muri icyo cyiciro, cyo gisuzumwamo ahanini uko Ibitaro bikora ubugenzuzi, gusesengura ibipimo(datas) n’ubushashahatsi butanga ibisubizo ku bibazo biba byaragaragaye mu mikorere no ku byarushaho kunoza imikorere n’imitangire ya serivisi z’ubuvuzi.
Ubuyobozi bw'Akarere burashimira
@Kirehe_Hospital umwanya mwiza wa 2 n'amanota 93% bagize muri Accreditation bukabasaba gukomeza gutanga Serivice Nziza ku bagana Ibitaro n'andi mavuriro pic.twitter.com/Am7ZPDjxgE— Kirehe District (@KireheDistrict) May 31, 2023
