Minisiteri y’Ubuzima ku bufatanye na Minisiteri y’Ingabo inkingo za Covid-19 zitangira guterwa abaturage mu byiciro bitandukanye kuri uyu wa gatanu zagejejwe hirya no hino mu bitaro n’Ibigo nderabuzima, kuzitera abo zagenewe bamaze gutegurwa bigomba gukorwa bitarenze amasaha 48.
Kuri uyu wa 03 Werurwe 2021 nibwo Minisiteri y’Ubuzima yatangaje ko yakiriye inkingo za Covid-19 zirenga 102,000 zo mu bwoko bwa ‘Pfizer’ zagejejwe mu Rwanda ku bufatanye bwa COVAX, zaje ziyongera ku zindi za ‘AstraZeneca’ zari zakiriwe uwo munsi.
Indege n’imodoka ni byo byifashishijwe mu kugeza izo nkingo mu turere tw’igihugu.
Mu turere turindwi tw’Iburasirazuba turimo Gatsibo, Ngoma, Kirehe, Nyagatare na Kayonza, ni indege yihutishije igikorwa cyo kutugezamo inkingo, mu tundi twa Bugesera na Rwamagana hakoreshwa imodoka.
Nk’uko bitangajwe na Minisiteri y’Ubuzima, izi nkingo zamaze kugezwa mu turere zigomba guterwa abantu bari mu byiciro byagenwe barimo abaganga n’abakora mu nzego z’ubuvuzi, abantu bageze mu zabukuru n’abandi bari mu byiciro by’abarusha abandi ibyago byo kwandura no kuzahazwa na Covid-19.
Inkingo zigera ku bihumbi 347 za Covid-19 ni zo biteganyijwe ko zirara zigejejwe mu bitaro 50 n’ibigo nderabuzima 508 hirya no hino mu gihugu.
Iri kingira rya Covid-19 biteganyijwe ko riraba kuri uyu wa 5 Werurwe 2021 hirya no hino mu gihugu, riba ribaye iry’icyiciro cya kabiri mu Rwanda, kuko hari abandi Minisiteri y’Ubuzima yari iherutse gutangaza ko bakingiwe muri Gashyantare 2021, ariko yemeza ko bari bake cyane ugereranyije n’abateganyijwe gukingirwa kuri iyi nshuro.
Intego za Leta y’u Rwanda ni uko uyu mwaka wa 2021 ugomba gusiga hakingiwe nibura 30% by’Abanyarwanda, mu gihe uwa 2022 uzasiga hakingiwe 60%.
Kuva Icyorezo cya Covid-19 yagera mu Rwanda muri Werurwe 2020, Minisiteri y’Ubuzima itangaza ko kugeza ubu abacyanduye basaga ibihumbi 19, abakivuwe bagakira basaga ibihumbi 17.5, mu gihe abakirwaye basaga 1,360; abo kimaze guhitana bakaba ari 265.
