Umugabo wo mu Karere ka Kayonza mu Murenge wa Gahini, yaraye atemye mu buryo bukomeye undi mugabo baturanye amaguru n’amaboko amuziza kumwahirira icyatsi.
Byabereye mu Mudugudu w’Akayenzi mu Kagari k’Urugarama mu Murenge wa Gahini.
Uwatemwe yitwa Harerimana Alphonse afite imyaka 45, naho uwamutemye azwi ku izina rya “Gitufu” afite afite imyaka 40.
Rukeribuga Joseph uyobora Umurenge wa Gahini aganira na MUHAZIYACU yavuze ko ibi byabaye ku mugoroba wo kuri uyu wa gatanu, umugabo watemye mugenzi we kuri ubu ngo aracyashakishwa.
Ati: “Yamuzizaga kumutemera icyatsi no kucyonesha, uwo mugabo yageze ku cyatsi cye ahita ajya kureba umuturanyi we kuko ngo ariwe yajyaga akeka ko abwiba, agezeyo aramutema mu buryo bukomeye ku kaguru n’akaboko ubundi arahunga.”
Gitifu Rukeribuga yakomeje avuga ko kuri ubu uwatemwe akirwariye ku Bitaro bya Gahini mu gihe inzego z’umutekano zifatanyije n’abaturage bari gushakisha uwo wamutemye.
