Impanuka y’ikirombe cy’amabuye y’agaciro yabereye mu Murenge wa Gitoki mu Karere ka Gatsibo mu gitondo cyo kuri uyu wa gatandatu yahitanye umusore w’imyaka 23 ubwo yarari gucukura amabuye.
Iyi mpanuka yahitanye uwitwa Munyengabe oscar, yabaye kuri uyu wa gatandatu saa yine za mugitondo mu Kagari ka Karubungo, Umudugudu wa Sata, aho abaturage bahuruje ubuyobozi bikimara kuba.
Umunyamabanga Nshingwabikorwa w’Umurenge wa Gitoki Mushumba John yabwiye MUHAZIYACU ko ubwo uyu musore yararimo acukira mu gisimu yahanukiwe n’ikibuye cyomotse mu nguni y’icyobo kimukubita mu mutwe abita apfa.
Yagize ati: “Yari umukozi wa kampani yaturutse i Muhanga, bazanye na kampani yitwa CMK ikorera hano Gitoki, baje mu kwezi kwa cumi umwaka ushize.”
Gitifu Mushumba avuga ko nta mpanuka yaherukaga y’ikirombe yaherukaga kubera muri uyu murenge ubarizwamo ibirombe bitatu by’amabuye y’agaciro.
Ubwo umunyamakuru yavuganaga n’umunyamabanga nshingwabikorwa w’Umurenge wa Gitoki mu ma saa tanu, hari hategerejwe ko urwego rw’ubugenzacyaha RIB ruhagera kugira ngo nyakwigendera ajyanwe kwa muganga akorerwe isuzuma mbere yo gutegura umunsi wo gushyingura.
