Mu myaka itanu ishize, Akarere ka Rwamagana kazamuye amafaranga gakusanya mu misoro, ava kuri 1,640,609,485 Frw mu mwaka wa 2020-2021 agera kuri 4,050,473,852 Frw, mu gihe cy’imyaka itanu yakurikiyeho.
Ibi bivuze ko amafaranga yakusanyijwe mu misoro yiyongereyeho 2,409,864,367 Frw, ni ukuvuga hafi 147% ugereranyije n’aho yari ari mu ntangiriro za 2020-2021.
Iri zamuka rishyira imisoro mu bintu by’ingenzi byahindutse mu miyoborere n’ubukungu bw’Akarere ka Rwamagana muri iyi myaka itanu.
Si amafaranga yiyongereye gusa mu isanduku y’Akarere, ahubwo ni n’ikimenyetso cy’ubushobozi bwo gukusanya umutungo w’imbere no kuwuhuza n’iterambere ry’Akarere.
Umuyobozi w’Akarere ka Rwamagana, Mbonyumuvunyi Radjab, yabwiye MUHAZIYACU ko imwe mu mpamvu z’ingenzi zatumye ikusanywa ry’imisoro rizamuka ari imyumvire y’abaturage, avuga ko Rwamagana ifite abaturage bumva gahunda za Leta kandi bakagira uruhare mu kuzikurikiza, harimo no gutanga imisoro.
Yagize ati: “Kuba imisoro yarazamutse muri Rwamagana, tubifata nk’ikimenyetso cyiza kigaragaza ko dufite abaturage beza, bumva gahunda za Leta kandi bakumva n’akamaro ko gutanga imisoro. Umuturage iyo asobanukiwe ko umusoro atanga ugira uruhare mu iterambere ry’Akarere n’Igihugu muri rusange, arushaho kugira uruhare mu kuwutanga.”
Raporo y’Akarere igaragaza ko ingengo y’imari yavuye kuri 22,396,416,515 Frw mu 2020-2021 igera kuri 39,630,797,234 Frw muri 2026-2027, bivuze ko yiyongereyeho 17,234,380,719 Frw.
Ibi bitanga ishusho y’uko ubushobozi bw’Akarere mu kubona no gukoresha umutungo bwiyongereye. Mu gihe cy’imyaka itanu, amafaranga ava mu misoro yikubye inshuro zirenga ebyiri, mu gihe ingengo y’imari na yo yazamutse ku rugero rugaragara.
Mu myaka itanu ishize, Rwamagana yanagaragaje izamuka mu bikorwa bitandukanye by’ubukungu.
Raporo igaragaza ko imirimo yahanzwe yazamutse ivuye ku 12,388 igera ku 30,987, bivuze ko hiyongereyeho imirimo 18,599.
Inganda na zo zazamutse ziva kuri 37 zigera kuri 44, mu gihe udusoko duto tw’ubucuruzi twavuye kuri 4 tugera kuri 15.
Nanone, imishinga mito n’iciriritse yafashijwe kubona inguzanyo mu bigo by’imari yavuye kuri 5,718 igera kuri 7,145, yiyongereyeho 1,427.
Iyi mibare itanga indi mpamvu yo kureba izamuka ry’imisoro mu buryo bwagutse. Iyo ibikorwa by’ubucuruzi n’ishoramari byiyongera, n’umubare w’abafite ibikorwa bishobora gutanga umusoro ushobora kwiyongera.
Iri zamuka ry’amafaranga akusanywa mu misoro muri Rwamagana rigaragaza impinduka mu bushobozi bw’Akarere bwo gukusanya umutungo w’imbere, mu gihe ibikorwa by’ubukungu na byo byagiye byaguka.
