Mukantare Odette wahungutse nta kintu na kimwe afite, ahamya ko ibintu byose ari mu mutwe kuko yahawe amahugurwa mu bihugu bitandukanye akamufasha kwihangira umurimo aho yatangiriye ku nkoko 100 none ubu ageze ku mitungo ifite agaciro ka miliyoni 102 Frw.
Uyu mugore witeje imbere atuye mu Mudugudu wa Gikoba Akagari ka Shonga, Umurenge wa Tabagwe mu Karere ka Nyagatare.
Mukantare yemeza ko kuba utarize bitatuma utaba umukire igihe wahuguwe neza, ariho ahera asaba abakiri bato kwihangira imirimo bakiteza imbere.
Ati” Nashyitse mu Gihugu cy’u Rwanda mu 1994, naje ntacyo mfite nta n’ishuri abantu bose barabizi, nagerageje gukora kuko buriya buri kimwe cyose nk’abana b’iki gihe ni mu mutwe. Nahawe amahugurwa ahagije muri Kenya na Uganda, mbona ntasigara inyuma ngo kuko ntize, nagerageje gukora ntangirira ku nkoko za kijyambere 100 ziza kuvamo inkoko 340.”
” Ibyo byangejeje ku kintu gikomeye kuko naje guhabwa Inka na Perezida Mwayi Kibaki wa Kenya, iyo nka na n’ubu niyo nkikomoraho inka mfite, ubu mfite 10 kandi sibyo byonyine kuko zamfashije gukora ubuhinzi bw’urutoki, imbuto ,ibirayi n’ibigori kandi nduhira nta kibazo cy’izuba ngura ndetse mfite n’abana batanu bize bafite icyo bakora.”
Mukantare kandi yemeza ko yahuye n’ubuzima butoroshye ubwo yahungukaga ava mu Gihugu cya Uganda kuko yatangiye aba mu nzu ya burende, nyuma aza kubaka inzu nto iciriritse kugeza Ubwo ngo yubatse inzu nziza itamukojeje isoni. Amaze kuyubaka ntiyarekeye aho kuko yaguze hegitari 8 z’ubutaka ndetse akaba yaranaguze inzu mu Mujyi wa Nyagatare.
Uyu mubyeyi ngo byamusabye guhozaho no kudacika intege kuko atangira ubworozi yahuye n’imbogamizi zitandukanye zishingiye ku kirere ariko ntiyadohoka arakomeza arakora .
Ati” Ndashimira cyane abakangurambaga mu buhinzi n’ubworozi, natangiye gukora ubworozi kera abantu bagacika intege sinzicike, ubu nshyitse ahantu bitakintera ubwoba, ubworozi bwose wabukora bantu mutekereza ko korora bigomba amafamu, muzanyegere tujye inama. Ubu nkoresha abakozi 10 mbatangira na mituweli, nakoresheje expertise ku mutungo wanjye nsanga mfite miliyoni 102 Frw.”
Mukantare Odette afite intego yo gushinga Kampani ikora ubuhinzi n’ubworozi akabasha guha imirimo abakozi benshi batandukanye ariko ngo arashimira Perezida Paul Kagame washyizeho imiyoborere myiza n’umutekano byamufashije kugera kuri ibyo byose.
