Ikigo cy’Igihugu cyo kubungabunga ibidukikije- REMA cyatangaje muri ibi bihe bya Shampiyona y’Isi yo gusiganwa ku magare, umujyi wa Kigali uri guhumeka umwuka mwiza bitewe n’uko hari imwe mu mihanda yari yarafunzwe idakoreshwamo ibinyabiziga.
Mu itangazo rigenewe abanyamakuru ryasohowe na REMA kuri uyu wa 30 Nzeri, rigaragaza bimwe mu byavuye mu busesenguzi bwakozwe hifashishijwe ibikoresho 10 bipima umwuka mu bice bitandukanye bya Kigali kugira ngo harebwe urwego rw’umwanda mu kirere ku mihanda yafunzwe n’itafunzwe, ibi bikoresho byari byashyizwe Gacuriro, Rusororo, Mont Kigali, Gikondo, Nyarutarama, Kibagabaga, Kimironko, Nyabugogo, na hafi ya RDB/Kimihurura
Isesengura rya REMA ryagaragaje ko gufunga zimwe mu nzira nini zo muri Kigali mu gihe cya UCI World Cycling Championships (22–28 Nzeri 2025) byagize uruhare runini mu gutuma haboneka umwuka mwiza, bitewe n’uko ibinyabiziga byari bike mu mihanda y’amasiganwa, ibipimo byerekanye ko imyuka mibi (PM2.5) yagabanutseho kugeza kuri 45% ku mihanda yafunzwe, naho ku mihanda yindi yari yahinduriwe inzira igabanuka hagati ya 30–35%.
Mu bice bidakorerwagamo isiganwa ho ntihabaye impinduka nini cyane.
Umuyobozi Mukuru wa REMA Kabera Juliet yasobanuye ko ibisubizo byabonetse bigaragaza neza uburyo kugabanya imodoka bigira uruhare mu guhumeka umwuka mwiza.
Mu gihe cya UCI Championships, umwuka wa Kigali wari mu rwego rwemewe n’amabwiriza y’ishami ry’umuryango w’ababumbye wita ku buzima-WHO, ibi bikaba byaba intandaro y’uko abantu bahumeka umwuka mwiza mu gihe bahisemo gushaka ubundi buryo bwabafasha mu ngendo zabo batangije umwuka bahumeka, aha harimo nko kugenda n’amaguru cyangwa se abakoresha amagare.
Mu gihe cy’icyumweru cy’amasiganwa, ibikoresho bipima umwuka byerekanye ko umwuka wari ukeye kurusha mu bindi bihe bisanzwe, kandi ibyago byo kugira imyuka mibi cyane byagabanutse ugereranyije n’ibipimo bisanzwe.
Ku mihanda yafunzwe , hagati ya saa sita pollution ntiyigeze irenga 30 µg/m³, mu gihe bisanzwe biba hagati ya 47–50 µg/m³. Ibi bigaragaza ko kugabanya imodoka byagize akamaro mu gukomeza umwuka mwiza, ndetse biba amahirwe yo gukomeza guhumeka umwuka mwiza mu masaha y’umugoroba.
Minisiteri y’Ibidukikije ibinyujije muri REMA yashyizeho uburyo bushya bwo gupima imyuka ihumanya iva mu modoka, nk’ikimenyetso cy’uko u Rwanda rwiyemeje kurengera umwuka, ubuzima rusange n’iterambere rirambye, Uretse ibyuma bipima umwuka byashyizwe i Kigali, REMA ifite n’ibindi bikoreshwa mu gihugu hose byifashishwa mu gupima umwuka.
