Umukinnyi w’umunya Nigeria Samson Babua uyoboye abafite ibitego byinshi muri shampiyona y’umupira w’amaguru mu Rwanda yahagaritswe n’icyorezo cya Coronavirus, yasezeye Sunrise FC, ubuyobozi buvuga ko amasezerano abafitiye atararangira.
Samson Babuwa wageze mu Rwanda mu mwaka wa shampiyona ya 2016/2017 ari kumwe n’undi rutahizamu na we wigaragaje cyane witwa Alex ndetse n’umutoza w’umunya Nigeria, aho bazanywe n’umunyamakuru Rutamu ubwo iyi kipe yari ivuye i Rwamagana yimukiye i Nyagatare.
Mu butumwa yanyujije ku mbuga nkoranyambaga Samson Babuwa yagize ati “Bidasubirwaho umwaka w’imikino wa 2019/20 washeshwe. Murabeho Sunrise, murabeho Nyagatare. Nagize ibihe byiza ndi mu Ntara y’Uburasirazuba.”
Rebero Emmanuel ushinzwe ubuzima bwa buri munsi bw’iyi kipe yabwiye MUHAZIYACU ko batarabona ibaruwa y’uyu mukinnyi isezera ku ikipe, anemeza ko hakibura amezi abiri kugira ngo uyu mukinnyi asoze amasezerano.
Yavuze ko bafite n’abandi bakinnyi benshi bazasoza amasezerano vuba aha ndetse ubuyobozi bw’ikipe buteganya kubaganiriza abo bishoboka bakagumana.
Muri shampiyona y’uyu mwaka aho yarigeze ku munsi wa 24, Samson Babua yari afite ibitego 15 akaba yari ayoboye abandi.
Hari amakuru avuga ko uyu mukinnyi ashobora gusinyira imwe mu makipe akomeye hano mu Rwanda nka Rayon Sport, As Kigali FC cyangwa akerekeza hanze y’u Rwanda, aho yifuzwa n’amakipe yo muri Kenya, Mozambique na Tanzania.
