Mu Karere ka Rwamagana kimwe n’ahandi mu Gihugu, hatangijwe ku mugaragaro ibizamini bya Leta, bisoza ibyiciro by’amashuri yisumbuye, ku rwego rw’Akarere, uyu muhango wo gutangiza ibi bizamini wabereye ku ishuri rya Center for Champions TSS.
Byatangijwe kuri uyu wa Gatatu, tariki ya 15 Nyakanga 2026, aho abanyeshuri bose mu Karere ka Rwamagana bari kubikora bageze ku 9,193, muri bo Icyiciro Rusange (O-Level) ni abanyeshuri 5,524 bari gukora ibi bizamini, icyiciro cy’ayisumbuye (A-Level) ni abanyeshuri 1,767 bari gukora, imyuga n’ubumenyingiro (TVET) ni abanyeshuri 1,469 bari gukora, Amasomo Mbonezamurimo (Professional Education), ni abanyeshuri 433 bari gukora; naho mu Karere hose ibizamini biri kubera kuri site 25.
Muri ibi bizamini, hashyizwe n’imbaraga mu burezi budaheza. Ku kigo cya HVP Gatagara, abanyeshuri bafite ubumuga bwo kutabona nabo bari gukora ibi bizamini bya Leta, aho bahawe ibizamini mu buryo bwabo bwihariye bworoheje imikorere yabo.
Umuyobozi w’Akarere wungirije ushinzwe imibereho myiza y’abaturage mu Karere ka Rwamagana, Umutoni Jeanne, yashimye imyiteguro yakozwe mbere y’uko ibi bizamini bitangira, ati: “Imyiteguro ni myiza abana barize, bakoze ibizamini byinshi byo kwimenyereza uko ibi bizamini bizakorwa, abarezi barahuguwe, twakoze umwiherero kugira ngo turebe ibishoboka byose byatuma ibi bizamini abana babitsinda.”
Uyu muyobozi kandi yahaye abanyeshuri ubutumwa bw’impanuro n’inama zibafasha kwitwara neza, ati: “Turasaba abanyeshuri kugira disipuline muri ibi bihe, bitonde, bakore neza, ntibahubuke. Turabifuriza intsinzi, ntihagire ukopera kuko barize, bize neza. Ubutumwa bukomeye tubaha ntihagire usiba ibizamini.”
Ku rwego rw’Igihugu, Ikigo cy’Igihugu gishinzwe Ibizamini n’Ubugenzuzi bw’Amashuri (NESA) cyatangaje ko abanyeshuri bose hamwe 258,255 bo mu byiciro bisoza amashuri yisumbuye ari bo batangiye gukora ibi bizamini bya Leta by’umwaka wa 2025/2026, bikaba biteganyijwe ko bizasozwa ku wa 24 Nyakanga 2026. Muri uyu mubare w’abakandida bose mu Rwanda, abanyeshuri 149,533 bari gukora ibizamini byo mu Cyiciro Rusange (O-Level) abandi 108,722 bakaba bari mu Cyiciro Cyisumbuye (A-Level) n’amashami y’imyuga. Hanashyizweho kandi ingamba zihariye zo gufasha abakandida 879 bafite ubumuga hirya no hino mu Gihugu.
