Mu rwego rwo gutangiza ibikorwa by’Icyumweru cyahariwe kwimakaza ihame ry’uburinganire, abaturage bo mu Karere ka Bugesera basabwe kugira uruhare mu gushaka ibisubizo bigamije kurushaho kwimakaza ihame ry’uburinganire mu muryango Nyarwanda.
Ibi babisabwe n’Umuyobozi w’Akarere wungirije ushinzwe imibereho myiza y’abaturage, Imanishimwe Yvette, ubwo yatangizaga ku mugaragaro icyumweru cyahariwe ihame ry’uburinganire kuri uyu wa Mbere tariki 21 Nzeri 2026 ku rwego rw’Akarere ka Bugesera kikaba cyabereye mu Murenge wa Rweru mu Kagari ka Kintambwe.
Visi Meya Imanishimwe yagaragaje ko uburinganire ari inshingano ya buri wese, kandi ko ari ukubaka umuryango n’Igihugu aho umugore n’umugabo, umukobwa n’umuhungu, bagira amahirwe angana yo kwiga, gukora, gutanga ibitekerezo, gufata ibyemezo no kugira uruhare mu iterambere.
Ati: “Mu rwego rwo kwimakaza uburinganire, turasabwa kurwanya imyumvire n’imigenzereze ibangamira umwe muri bo, gukumira ihohoterwa rishingiye ku gitsina, no gushishikariza buri wese kugira uruhare mu bikorwa bigamije iterambere.”
Akomeza agira ati: “Turifuza ko iki cyumweru kiba umwanya wo kwibaza icyo buri wese yakora kugira ngo uburinganire burusheho kuba umuco mu miryango yacu, mu kazi, mu nzego z’ubuyobozi no mu baturage muri rusange. Turifuza kugira umuryango urangwa n’ubwubahane, uburinganire n’ubwuzuzanye aho amahirwe umwe abona ari nk’ay’undi.”
Bimwe mu bikorwa biteganyijwe mu Cyumweru cyahariwe kwimakaza ihame ry’uburinganire mu Karere ka Bugesera, harimo kuzakora ubukangurambaga mu mugoroba w’imiryango, gukumira inda zitifuzwa, gusezeranya imiryango mu buryo bwemewe n’amategeko, kwandika abana mu bitabo by’irangamimerere batanditswe, kuvura abana imirire mibi no kwigisha ababyeyi gutegura indyo yuzuye ku marerero ndetse n’ibindi bikorwa bigamije gufasha abaturage kugira umuryango uteye imbere.
Mu Karere ka Bugesera, by’Icyumweru cyahariwe kwimakaza ihame ry’uburinganire, gifite insanganyamatsiko igira iti: “Ihame ry’uburinganire, inkingi y’umuryango ushoboye kandi utekanye”.
Iki gikorwa kandi cyahujwe no kwizihiza Icyumweru cy’Irangamimerere gifite insanganyamatsiko igira iti “Irangamimerere rikozwe neza ni inkingi ya serivisi inoze”.
