Akarere ka Rwamagana kashyizeho intego yo guhinga hegitari 36,511 mu gihembwe cy’ihinga cya A 2027, aho gateganya kongera umusaruro w’ibigori, ibishyimbo, soya, imyumbati n’umuceri, mu gihe abahinzi basabwa gutegura ubutaka hakiri kare no gukoresha inyongeramusaruro n’uburyo bw’ubuhinzi burengera ubutaka.
Mu myiteguro y’iki gihembwe, Akarere ka Rwamagana kakoze ubukangurambaga mu mirenge yose 14, hagamijwe gushishikariza abahinzi gutangira kare gutegura ubutaka no kwitegura gukoresha neza imvura y’iki gihembwe.
Hatanzwe kandi amahugurwa ku Bajyanama b’ubuhinzi n’abashinzwe ubuhinzi mu mirenge, hibandwa ku buhinzi busigasira ubutaka, buzwi nka Conservation Agriculture (CA), ndetse n’imikoreshereze ya Smart Nkunganire.
Mu gihembwe cya A 2027, Rwamagana iteganya guhinga ubutaka bungana na hegitari 36,511, ziromo hegitari 17,140 zizahingwaho ibigori, 17,703 zihingwemo ibishyimbo, 415 zihingwemo soya, 833 zihingwemo imyumbati, naho 420 zizahingwaho umuceri.
Akarere gateganya ko umusaruro w’ibihingwa byatoranyijwe uzazamuka, mu rwego rwo gutanga umusanzu mu ntego ya gahunda y’Igihugu yo kwihutisha iterambere, NST2, yo kongera umusaruro ku gipimo cya 50%.
Ku bigori hateganyijwe umusaruro uri hagati ya toni 6 na 8 kuri hegitari, ibishyimbo bikagera kuri toni 1.5 na 2 kuri hegitari, naho umuceri ukagera kuri toni 6 na 7 kuri hegitari.
Bamwe mu bahinzi bo mu Karere ka Rwamagana bavuga ko batangiye kare imyiteguro y’igihembwe cya A 2027, birimo gutegura ubutaka, gushaka inyongeramusaruro no kwiyandikisha muri gahunda ya Smart Nkunganire.
Mbereyimfura Jean Bosco, umwe mu bahinzi bo mu Murenge wa Nzige, yabwiye MUHAZIYACU ko amaze gutegura ibikenewe byose kugira ngo igihe cy’ihinga kizamugereho yiteguye.
Yagize ati: “Namaze kwitegura, namaze kwiyandikisha muri Smart Nkunganire, namaze gutegura ifumbire y’imborera, nateguye ubutaka ku buryo tubusigasira .”
Undi muhinzi, Marayika Gabriel, avuga ko imyiteguro ye igeze hafi ku musozo, cyane ko amaze gutegura aho azahinga ibigori no gushyiraho intera izafasha ibihingwa gukura neza.
Yagize ati: “Duhinga duharura, imyiteguro yanjye igeze kuri 90%, kuko namaze gucukura imyobo nzateramo ibigori ku bipimo byagenwe, aho hagati y’umwobo n’undi nsigamo santimetero 75. Nkorana na Tubura kugira ngo impe inyongeramusaruro.”
Imibare y’Akarere igaragaza ko umuceri ari wo ugeze ku rwego rwo hejuru mu gutegura ubutaka no gutera. Ku ntego ya hegitari 420 z’umuceri zose zaratewe zinarengaho.
Ku bigori, hamaze gutegurwa hegitari 12,340, zingana na 72% by’intego ya hegitari 17,140. Ibishyimbo byo bimaze gutegurirwa hegitari 13,450, zingana na 76% by’intego ya hegitari 17,703.
Soya imaze gutegurirwa hegitari 215, bingana na 52% by’intego ya hegitari 415, naho imyumbati imaze gutegurirwa hegitari 510, bingana na 61% by’intego ya hegitari 833.
Umuyobozi w’Akarere ka Rwamagana, Mbonyumuvunyi Radjab, avuga ko igihembwe cya 2027A ari ingenzi mu mwaka w’ihinga, bitewe n’uko kigira imvura imara igihe kandi hakabonekamo ibihingwa bitinda mu butaka nka soya n’ibigori.
Mu kiganiro yagiranye na MUHAZIYACU, Meya Mbonyumuvunyi, yagize ati: “Nk’uko mubizi, mu Rwanda tugira ibihembwe bitatu by’ihinga, ariko igihembwe cya A ni cyo kiba gihatse ibindi byose kuko ari cyo gihe tugiramo imvura imara igihe kinini n’ibihingwa bitinda mu butaka nk’ibigori na soya, akaba ari cyo gihe tubihingamo.”
Yakomeje agira ati: “Ni na cyo gihe kigira umusaruro mwinshi ubasha gutunga abaturage. Iyo iki gihembwe cyateguwe neza, ibindi bihembwe bya B na C biza byunganira A.”
Meya Mbonyumuvunyi asaba abahinzi guhingira ku gihe kugira ngo imvura itazarangira imyaka itarera, no gukoresha ubutaka bwose bushobora guhingwa, ati: “Abahinzi turabasaba guhingira ku gihe kugira ngo bitazababera ikibazo imvura igacika mbere y’uko imyaka yera. Turabasaba ko bahinga ubutaka bwose budafite ikindi kintu bukorerwaho, kabone n’iyo baba ari metero eshanu ziri munsi y’urugo.”
Yongeyeho ko abahinzi bakwiye kwitabira ubuhinzi bugezweho kandi burengera ubutaka, bakoresha inyongeramusaruro n’imbuto nziza kugira ngo umusaruro wiyongere ndetse umuhinzi abone inyungu ihagije ku murimo yakoze.
Ati: “Turabasaba kandi guhinga kijyambere, bakamenya guhinga badakomeretsa ubutaka, ndetse no guhinga bakoresheje inyongeramusaruro n’imbuto nziza zitanga umusaruro, bityo umuhinzi akabona inyungu kuri ya mirimo yakoze.”
Mu rwego rwo kongera umusaruro, Akarere ka Rwamagana gateganya gukoresha 1,103,485 kg z’inyongeramusaruro ya DAP. Kugeza ubu, mu maduka y’abacuruza inyongeramusaruro habarizwa 292,533 kg za DAP, zingana na 27% by’ingano ikenewe. Ku ifumbire ya UREA, Akarere gateganya gukoresha 970,926 kg, muri zo 284,260 kg zikaba ari zo zimaze kugera mu maduka, zingana na 29% by’izikenewe.
