Urwego rw’Igihugu rushinzwe kugenzura imikorere y’inzego zimwe z’imirimo ifitiye Igihugu akamaro(RURA) rwatangaje amabwiriza mashya y’ingendo mu Mujyi wa Kigali n’Intara bitewe n’ingendo zikorwa ari nyinshi mu mpera z’umwaka aho nk’abagenzi bajya i Bugesera bazajya bategera muri gare ya Nyanza ya Kicukiro.
RURA yabitangaje mu itangazo yanyujije kuri X kuri uyu wa Kabiri, tariki 17 Ukuboza 2024.
Iri tangazo riramenyesha Abaturarwanda bose ko bitewe n’ingendo zikorwa ari nyinshi mu mpera z’umwaka, abantu bajya kwizihiza iminsi mikuru ya Noheli n’Ubunani hirya no hino mu Gihugu, rimwe na rimwe bigateza ibura ry’imodoka zitwara abagenzi mu buryo bwa rusange ndetse n’umuvundo ukabije muri gare ya Nyabugogo.
Ku wa 23 kugera 24 Ukuboza 2024 no ku wa 30 kugera 31 Ukuboza 2024 abagenzi bazategera imodoka aha hakurikira,
Abagenzi bakoresha umuhora w’Amajyepfo(Kamonyi, Muhanga, Ruhango, Nyanza, Huye, Nyamasheke, Karongi, Ngororero, Gisagara, Rusizi, Rutsiro na Nyaruguru) bazategera imodoka i Nyamirambo kuri stade ya Pele.
Abagenzi bakoresha umuhora w’Iburasirazuba( Rwamagana, Kayonza, Gatsibo, Nyagatare, Ngoma, Kirehe) bazategera imodoka muri gare ya Kabuga.
Abagenzi bakoresha umuhora w’Amajyaruguru(Gicumbi, Nyagatare unyuze i Gicumbi, Rulindo, Musanze, Rubavu, Burera, Gakenke na Nyabihu) bazategera imodoka muri gare ya Nyabugogo.
Abagenzi bajya i Bugesera bazategera muri gare ya Nyanza ya Kicukiro.
RURA yavuze ko yafashe izi ngamba mu rwego rwo gufasha abakora izo ngendo; igira inama abateganya gukora ingendo zabo ko bagura amatike hakiri kare mu rwego rwo kwirinda umuvundo.
