Inteko rusange y’Umuryango FPR Inkotanyi ku rwego rw’Intara y’Iburasirazuba yabereye mu Karere ka Kayonza kuri uyu wa Gatandatu, yatoye Rubingisa Pudence ku mwanya wa Chairman w’Umuryango FPR Inkotanyi muri iyi Ntara; n’amajwi 708.
Iyi nteko rusange y’Umuryango FPR Inkotanyi yo kuri uyu wa 8 Gashyantare 2025, yitabiriwe n’abanyamuryango ba FPR Inkotanyi basaga 1200, bayoboye inzego z’umuryango zitandukanye mu turere, n’imirenge byo mu Ntara y’Iburasirazuba.
Rubingisa Pudence ni we watorewe kuba Chairman w’Umuryango FPR Inkotanyi mu Ntara y’Iburasirazuba n’amajwi 708, mu gihe abandi bahataniraga uyu mwanya barimo Gasana Richard yagize amajwi 271; na Gasana Steven watowe ku majwi 259.
Mu bandi batowe mu nzego n’Umuryango ku rwego rw’intara harimo Umunyamabanga hatowe, Uwamariya Josette, Umuyobozi wa Komisiyo y’Ubukungu hatowe Sijyenibo Jean Damascène, Umuyobozi wa Komisiyo y’imibereho myiza hatowe Mukaneza Pelagie.
Umuyobozi wa Komisiyo y’imiyoborere myiza ni Rwakibibi Pascal, Umuyobozi wa Komisiyo y’Ubutabera, Gahutu Jean Paul.
Abahagarariye urubyiruko hatowe, Umwali Clarisse, Uwizeyimana Esther, na Nkurikiyimana Osée.
Ku mwanya w’Umuyobozi wungirije w’Umuryango FPR Inkotanyi mu Ntara(Visi Chairman) hatowe Manishimwe Gilbert n’amajwi 521 arusha abarimo Mapambano Nyiridandi Cyriaque wagize amajwi 345 na Bamwiza Sarah wagize 372.
Nyuma yo gutorwa, Chairman w’Umuryango FPR Inkotanyi mu Ntara y’Iburasirazuba, Rubingisa Pudence yashimiye abamutoye avuga ko bagiye gufatanya mu kongera umubare w’abanyamuryango.
Yagize ati “Turabashima cyane ko mutugiriye ikizere, turabashima cyane ko mudutumye ariko tunabashima cyane ku bufatanye tugiye kugirana mu gushyira mu bikorwa gahunda y’umuryango.”
“Umuryango wacu ni moteri, tuzafatanya cyane cyane mu bukangurambaga, twongere umubare w’abanyamuryango, dufatanye mu kubahugura kugira ngo twese tujyanemo, dutahirize umugozi umwe dushyire imbere inyungu z’umuturage ari nako twimakaza ihame ry’uburinganire.”
Umunyamabanga Mukuru w’Umuryango RPF Inkotanyi, Gasamagera Wellars mu ijambo yagejeje ku bitabiriye iyi nteko rusange yibukije abatowe kumenya inshingano batorewe zirimo kumenya ibigenda n’ibitagenda
Yagize ati:“Banyakubahwa mutowe, mugiriwe icyizere, icyizere kiraruhanya kugira ngo uzagihamane ugomba gukora utikoresha, ugomba gushyiramo imbaraga inshuro eshanu zirenze iza bagenzi banyu.”
Yakomeje agira ati: “Bagenzi banyu baravuze ngo ni mwebwe mwatuyobora, ni mwebwe tubona mwajya imbere twashyira mbere, bivuze ngo no kujya gusubiza ibyo mutumwe nimwe muzabibazwa mbere,[…] Nta na rimwe tuzabura ibidatunganye 100% ariko dufate ingamba tuzihutishe tubivaneho tubizamure.”
Yabasabye guhindura abanyamuryango harimo n’umuryango Nyarwanda babavana aho babona bahagaze neza babajyana aheza kurushaho.
Gasamagera yavuze ko kimwe mu bintu bituma ibintu bitagenda ari uko abanyamuryango badafite ireme.
Ati “Turabarahiza tukabinjiza mu muryango ntutubakurikirane ngo dukomeze tubigishe, tunarebe ibyo bakeneye, n’ibyo babuze; nanone twite kuri ya nshingano yacu kugirango tubafashe kubyuzuza.”
Yanabwiye Intore z’Umuryango FPR Inkotanyi mu Burasirazuba ko kugira ngo ibikorwa biri muri manifesto bigerweho, bisaba gukora cyane, asaba abatorewe mu nzego z’ubuyobozi kumanuka bakegera abo bayobora, bagaharanira impinduka ya buri muturage.
