Perezida wa Repubulika y’u Rwanda, Paul Kagame, yihanganishije Perezida wa Tanzania, Samia Suluhu Hassan, n’umuryango we ku rupfu rw’umugabo we, Hafidh Ameir Hassan, wapfuye kuri uyu wa Mbere, tariki ya 7 Nzeri 2026.
Mu butumwa yanyujije ku rukuta rwe rwa X, Perezida Kagame yagaragaje ko ababajwe n’urupfu rwa Hafidh Ameir Hassan, yihanganisha Perezida Samia, umuryango we ndetse n’abaturage b’Igihugu cya Tanzania.
Ati: “Bimvuye ku mutima, nihanganishije mushiki wanjye, Perezida Samia Suluhu Hassan, umuryango we n’abaturage ba Tanzania ku rupfu rwa Hafidh Ameir Hassan. Leta y’u Rwanda n’abaturage twifatanyije na Perezida Samia Suluhu Hassan n’abavandimwe bacu b’abanya-Tanzania muri ibi bihe byo kuzirikana ubuzima bwa Nyakubahwa Hafidh Ameir Hassan.”
Hafidh Ameir Hassan yapfuye afite myaka 76, aguye mu Bitaro by’Urwibutso bya Emilio Mzena, i Zanzibar, aho yavurirwaga indwara y’umutima.
Urupfu rwe rwatangajwe na Visi Perezida wa Tanzania, Deogratius Ndejembi.
Hafidh Ameir Hassan yari umwarimu uri muzabukuru aho yanakoze ubushakashatsi mu buhinzi ari nabwo yakoraga cyane. Nubwo yari umugabo wa Perezida wa Tanzania, Samia Suluhu Hassan yakundaga kubaho mu buzima bwite, atagaragara cyane mu ruhame.
Yashakanye na Samia Suluhu Hassan mu 1978, mbere y’uko agera ku buyobozi bukuru bwa Tanzania. Bombi babyaranye abana bane, abahungu batatu n’umukobwa umwe.
Umukobwa wabo, Mwanu Hafidh Ameir, na we yakurikije Mama we muri Politike aho kuri ubu ari umwe mu bagize Inteko Ishinga Amategeko ya Zanzibar.
