Urubyiruko rw’abakorerabushake rwa Nyagatare rwibumbiye muri koperative yitwa ‘Nyagatare Volunteer servers development cooperative ‘ rwiyemeje gukora ibikorwa bitandukanye biruteza imbere ariko bakabifatanya no kurinda abaturage Ibitera byajyaga bibangiriza ibyabo haba mu mirima no mu ngo zabo.
Iyi koperative ikora ibikorwa bitandukanye byo kwiteza imbere birimo ubuvumvu, ubuhinzi, gukora ibiryo by’amatungo, imbabura n’ibicanwa bidahumanya ikirere bya Briquettes na Pellet, hanyuma bakabifatanya no kurinda ko Ibitera byajya mu ngo no mu mirima y’abaturage kubangiriza.
Ku bufatanye n’Akarere iyi koperative yatewe inkunga na RDB ingana na miliyoni 26Frw bari kwifashisha mu bikorwa byabo by’iterambere birimo kugura amamashini n’ibindi bikoresho nkenerwa ariko hakabamo n’amafaranga yagenewe gukoreshwa mu kurinda abaturage Ibitera.
Ni muri urwo rwego iyi koperative ikorera mu Karere ka Nyagatare, Akagari ka Barija, Umudugudu wa Barija B, yahaye umpuzankano abashinzwe kuzajya barinda ibitera bagera kuri 12, igizwe n’amasarubeti, ingofero, bote, amakote y’imvura n’uturindantoki; byatwaye asaga miliyoni eshatu.
Umuyobozi w’iyi koperative avuga ko ibi bikoresho bahaye abitwa abarinzi b’ibitera bigiye kujya bibafasha guhora biteguye cyane ko byagaragaye ko ibitera bifite ubwenge kuko byacungaga mu gihe cy’imvura bikaba aribwo biza kononera abaturage.
Safari Francis akaba umuyobozi wa koperative Nyagatare Volunteer servers development yagize ati: “Turashimira ubuyobozi bw’Akarere kuko bwadufashije kubona inkunga kugira ngo duhangane n’ibitera birimo kwangiriza abaturage, bikunze kuzamuka bikava mu mikinga bibamo bikajya kwangiriza abaturage, ibyo byose rero ni byo twarebyeho dufata umwanzuro wo gushaka uburyo bwo gukemura iki kibazo kugira ngo birekere kongera kwangiriza abaturage.”
Yakomeje agira ati: “Nubwo bitoroshye ariko kuba twarabonye inkunga yo kudufasha tuzakomeza gushyiramo imbaraga kugira ngo tubikumire kubera ko ubu dufite abashinzwe ku birinda, kandi biratanga icyizere kuko mu mbogamizi bari bafite zirimo kuba nta mpuzankano bagiraga ariko kuba bazihawe biratanga icyizere ko tuzakomeza kurwanya ibitera byazamukaga bikajya konera abaturage twifashishije abarinzi babyo.”
Uwiringiyimana Josiane akaba umwe mu bakozi bahawe akazi bakora imbabura, akaba akamazemo ukwezi kumwe, yagize ati: “Kuva nahabwa akazi maze gutera intambwe kuko maze kwigurira telefone igezweho kuko nkimara gusoza amasomo nari mfite ikibazo cy’ikoranabuhanga rero hari amakuru menshi ntabonaga bitewe n’uko nta koranabuhanga nari mfite ariko ubu ikibazo cyarakemutse.”
Umuyobozi w’Akarere ka Nyagatare wungirije ushinzwe imibereho myiza y’abaturage Murekatete Juliet yashimiye urubyiruko rwishyize hamwe.
Yagize ati “Abaturage bagiye bagaragariza ubuyobozi ko bazengerejwe n’ibitera aho bijya mu ngo z’abaturage ndetse no mu maduka hanyuma dufata umwanzuro dufatanyije na RDB ko dushaka itsinda rihoraho rishinzwe kubirinda ko byaza kwangiriza abaturage no gutembera mu mujyi kandi bidakwiye, rero turashimira uru rubyiruko kuba rwarishyize hamwe kugira ngo rwiteze imbere kandi runatange umusanzu warwo mu gukumira Ibitera.”
Mu bisanzwe Nyagatare Volunteer servers development cooperative igizwe n’abanyamuryango bagera kuri 75, barimo abakobwa 40 n’abahungu 35.
Iyi koperative ifite gahunda yo gutera ibiti bizwiho kuba ari ibiribwa by’ibitera mu rwego rwo gutuma bibona ibyo birya cyane ko akenshi bijya kononera abaturage bishaka ibyo kurya, byongeye kandi 90% by’abagize iyi koperative ni urubyiruko kuko abagera kuri 70 ni urubyiruko, 5 basigaye nibo batakiri mu myaka y’urubyiruko.
Iyi koperative yatewe inkunga na RDB ingana na miliyoni 26 ndetse inabafasha mu kubahugura aho bahawe n’impamyabumenyi zabo zigaragara ko ibyo bakora babihuguriwe.
Umuyobozi w’iyi koperative avuga ko abarinzi 12 bashyizweho nibakora inshingano zabo uko bikwiye, bizafasha kugabanya ibihombo abaturage baterwaga no kwangirizwa n’ibitera, mu gihe urubyiruko rwo ruzakomeza gukorera hamwe mu bikorwa by’iterambere.
